Artêşa tirke 14ê nîsana 2022yî de Başûrê Kurdîstanî de vera Zap, Metîna û Avaşînî hêrişê îşxalî da destpêkerdene. Têkoşîno tarîxî yê gerîlayanê HPG û YJA Starî yê vera îşxalkeran dewam keno. Hemkarîya PDKyî ya bi îşxalkeran reyna bi dîmenan ameye îspatkerdene.

Hêzanê PDKyî yê ke verî zî verê lojîstîkê gerîlayan girewt, tay cayan de dormeyê gerîlayan girewt ke wa meeşkê têbigêrê û gerîlayî dayî xapî ro û semedê wesayîtanê zirxinan ê leşkeranê tirkî rayîr viraşt,  na rey zî Girê Hakarî yê Metîna de vazdayê gazîya artêşa tirke. PDK senî xîzmetê artêşa tirke de yo pê kamerayan ame antene.

PDKyo ke wazeno bibo yelegê ganî yê artêşa tirke aşma temmuze de na herême de dest pê gureyî kerd û aşma tebaxe de gureyê xo zêdînayî. PDKyî verî warê Tepê Ortê yê Metîna de pîya bi wesayîtanê zirxinan dest pê viraştişê qerargeh û stargehan kerd. Dima mabênê Waranê Xoverdayîşî yê Girê Hakarî û Girê Amedîyê de pê kepçeyan semedê dewleta tirke rayîr ame viraştene.

Xizmetê ke PDKyî artêşa tirke rê kerdî verê xoverdayîşê gerîlayan nêgirewt. Payîz de gerîlayanê HPG û YJA Starî ke vera artêşa tirke operasyono şorişgêr kerd 26-27ê kanûna 2022yî de Girê Hakarî de hinî şîyî îşxlakeran ser ke ê hinî nêeşkê tîya vinderê.

Hêzê PDKyî ke cade vazdayî gazîya artêşa îşxalkera ke Girê Hakarî de zor dîya ci, cayê ke dewlete tirke wazenê debikewo la nêeşkeya bireso ci, nê cayan de baregehê leşkerî nayî ro. Seba ke gerîlayî hêrişê Girê Hakarî mekerê zî hîrê nuqtayanê cîya cîyayan de beyraqê Îdareyê Herêma Kurdîstanî daliqnayî.  

Nê cayan ra yew zî Girê Sêdarê yo ke tek nuqtayo ke şino Girê Hakarî. Beyraqa ke tîya baregehê leşkerî de ameya daliqnayene, ma dîmenê ci antî la ma tam nêzanê nê baregehî de hêzê kamî manenê. Koyanê ver bi Amedîyê de zî mewzîyê PDKyî est ê. Warê ke tede verî pêkewtişê giranî qewimîyayî de mewzîyê artêşa tirk binê beyraqa Herêma Kurdîstanî de estbîyayîşê xo domnenê.

Girê Hakarî yo ke sînorê Tirkîya-Iraqî ra 15 kîlometre dûrî de yo û nuqtaya tewr berz a Amedîyê ya, cayêko stratejîk o. Girê Hakarî hetê PDKyî ra bi viraştişê rayîrî xeta sînorî rê ame girêdayene. Artêşa tirke pê nê rayîrî tanq, wesayîtanê zirxinan û malzemeyê leşkerî resnena Girê Hakarî.

Nika rojhelatê awa Zapî de, warê Metîna de têna Girê Hakarî de hêzê artêşa îşxlakere est ê. Badê xoverdayîşê gerîlayan artêşa îşxalkere mecbûr mend ke qiranê bînan caverdo. PDK dormeyê Girê Hakarî de baregehan virazeno ke wa kelaya peyên a artêşa tirke ya herême megino war.