Endama Koseya Serekîya Pêroyîye ya KCKyî  Sozdare Avesta derheqê Newroza 2023yî de mesajo bivîdeo pare kerd. Avesta şexsê şehîdanê Newroze Mazlûm Dogan, Mahsûm Kormaz, Zekîye Alkan, Rahşane Demîrel, Ronahî û Bêrîvane, Sema û Yuce û Fîkrî Baygeldîyî de heme şehîdî bihurmet û minetî yad kerdî û nê vatî:

Newroze ganîbîyayîş, cuyeyêka newî ya

Bi vejîyayîşê Rayber Apo û Têgêrayîşê Azadîye adirê Newroze hinda dahîna xurt yeno tavistene. Newroze roşanê şarê xoverdayoxî yo. Newroze ganîbîyayîş o, cuyeyêka newî ya. Newroze mijdanê amayîşê wirsarî yo. Newroze vera zaliman serhildan o. Roja persayîşê hesabê girdî ya. Hesabo verên 50 serrî verî bi vatişêkê Rayber Apoyî dest pêkerd. Rojêka Newroze de Rayber Apoyî vat 'Kurdîstan kolonî yo û semedê azadkerdişê ci gerek têkoşîno bêmabê û şerê şarê şorişgêrî bêro rayraberdene.' Bi çîqê nê vatişî adiro ke ame tavistene 50 serrî yo heme Kurdîstan û teberê welatî de bi meşaleyo gird ê azadîye.  No roşano gird; bi maratonê ganîbîyayîşî yê Rayber Apoyî. Coka ez Rayber Apoyî zerrîya safî ra silam kena û heskerdiş, hesret û minetdarîya xo îfade kena.

Gerek şarê ma herra xo cameverdo

Newroza emserî sey serranê bînan nîya. Hema bi hezaran însanê ma binê rijnayîşê erdlerzî de yê. Hema zî humara kesanê ke dinyaya xo vînî kerde zelal nêbîya. Xora humara ke ameye eşkerakerdene naye ra zafê kesan dinyaya xo bedilnaye. Bi na wesîle ez wazena vajî ke ez dejê heme keyeyan pare kena. Şarê ma şarêko xoverdayox o. Bitaybetî Mereş, Semsûr, Meletî û Dîlok de herême têkoşînî yê Têgêrayîşê Azadîye yê. Mereş de keda pîle ya Kemal Pîran û Dîlok de keda pîye ya Hakî Kareran est a.  Nê embazê serkêşê Têkoşînê Azadîye Kurdîstan û Tirkîya de fîkrê azadîye vila kerd. Dişmen wazeno nê cayan veng bikero û demografîkê ci bibedilno. Gerek şarê ma herra xo cameverdo. Şertî zehmet bê zî herra xo de bimano.

Dişmen her wextî ra zafêr hêriş keno

Ma sey Têgêrayîşê Azadîye yê Kurdîstanî berpirsîyarîya xo wîjdanî û ehleqî arde ca û rojanê verênan ê erdlerzî de qerarê vindarnayîşê çalakîyan girewt. Dişmeno faşîst, dîktator Erdogan û Bahçelî hema bêmabên hêriş kenê. Hem vera gerîlayanê azadîye hem zî vera Rojawan, Başûrê Kurdîstan û Şingalî hêrişî her wextî ra zafêr yenê kerdene.  Gerîlayê azadîye pozîsyonê xopawitişî de yê. Dewleta tirke xelêk herêman de tim qirkerdiş kena. Tewr peynî de Şingal de fermandarê YBŞyî hêzanê asayîşî şehîd bîyî. Wa sereyê merdimanê şehîdan, YBŞ û heme şarê ma weş bo. Şarê ma wa hole bizano ke bi nê hêrişan wazenê îradeyê şarî bişikinê.

Wa warê Newroze biaçarîyê waranê serhildanî

Emser hetê muzîk û şayîye ra cîya bo zî gerek warê Newroze biaçarîyê waranê serhildanî. Şarê ma Newroza emserî de gerek her werxtê ra xurtêr bi ruhê xoverdayîş, qesas û hesabpersayîşî wirzo payan ser. îrade û şorişê cinîyan o ke xeta Mazlûman, Egîdan, Bêrîtanan û Zîlanan de vejîya werte, gerek bi fînalê girdî bêro tacîdarkerdene. Newroza emserî zaf muhîm a.Wezîfeyê ma pêrun o ke ma têkoşînî xurtêr bikerê.

Wextê hesabpersayîş o

Rojdemê ma zelal o. Caardişê azadîye fîzîkîye ya Rayber Apoyî, hinda rijnayîşê nê sîtemî, Pêkerdişê Lozanî û faşîzmî xîyal nîyo. Hinda wextê hesabpersayîşî yo. Wextê betalkerdişê heme hêrişan o.Vera modernîteya kapîtalîste têkoşîn têna bi serkêşîya cinîyan de bi averberdişê netewa demokratîke mumkun o. Azadîya cinîyan bingehê heme azadîyan a.

Ma do xeta Mazlûm û Zekîyan de miheqeq ser bikewê

Na çarçewe de ez serrgêra 18. ya KCK û KJKyî pîroz kena. Rayberê sîstemê konfederalîzmê demokratîkî Rayber Apoyo ke no fikr afirna û dîyarîya şaran kerd, ez ey reyna silam kena. Ez Newroza Rayber Apoyî, heme cinîyan, xoverdayoxanê zîndanan, gerîlayanê azadîye pîroz kena. Reyna heme şarî û dostê  ke Newroze sey roşanê xo pîroz kenê, ez Newroza înan pîroz kena. Ma do xeta Newroze, xeta Mazlûm û Zekîyan de miheqeq ser bikewê.  Na çarçewe de; "Bijî Serok Apo", "Jin, Jiyan, azadî", "Bijî Newroz.''