Endama Konseya Serekîya Pêroyî ya KCKyî Sozdare Avesta tewra bernameyê Stêrk TVyî bîye û rojdem ercna.

Qiseykerdişê Sozdare Avesta ra beşêk wina yo:

''Ez şehîdanê hezîrane şexsê Zeynepe Kinaci (Zîlane), Sema Yuce, Fîlîze Yerlîkaya (Gulane), Leyla Agirî û Fîkrî Baygeldî de yad kena. Hezîrane de çalakîyê fedayî ameyî kerdene, çalakîya embaze Zîlane zî wina ya. 6ê gulana 1996î de vera Rayberîye Şam de pê wesayîtê bombabarkerdeyî suîkast amebi kerdene.  Embaze Zîlane seba ke nê suîkastî bişikna Dêrsim de çalakîya fedayî kerde. Rayberîye mektuba embaze Zîlane sey manîfestoyî ercnaye. Na çalakîye ser ra 25 serrî vîyartî la hema zî girîngîya ci dewam kena. Yê aye çalakîye ra zêdêr xetêk a.

PKK û PAJK partîyê şehîdan ê. Cinîyan mojna ke ê zî eşkenê têkoşîn û şoriş de ca bigêrê. Cinîyî deyndarê Rayber Apoyî û embaze Sara yê. Embaze Zîlane û Sema morê xo da bibê têkoşînî. Şehîda ma ya yewîne zî Besê Anûş a. Artêşbîyayîşê cinîyan xeta Bêrîtane ser o ronîya. Îdeolojîya Xelisîyayîşê Cinîyan a Rayberîye zî vîrameyîşê embaze Zîlane ser o ronîyaye.

Embaze Sema zîndan de vera tasfîyekerdişê Rayberîye bedenê xo da adirî ver. Embaze Sema ra verî zî embaz Fîkrî Baygeldîyî çalakîya fedayîye kerde. Ey mektuba xo de vato embaze Sema û embazê cinîyî fermandarê ey ê û ey fermanê na çalakîye înan ra girewto. Komployê vera Rayberîye ra verî PKKyî mîyanê xo de xeta cinîyan, partîbîyayîşê cinîyan 1998 de naro. Komployî ra dima zî nê partîbîyayîşê cinîyan dewam kerd.

Rayberîye wexto ke 1999 de ame esîrkerdene embaze Gulane delegeya kongreya 6. ya PKKyî bîye. Wexto ke ma hêzê fedayîyî yê vera Komployî awan kerdî reya verê embaze Gulane xo pêşnîyaz kerde. Embaze Gulane warê Rayberîye de mendbi, Rayberîye şinasnayêne. Embaze Gulane kongreya cinîyan de hetê hêzanê komplogeran kişîyaye. Xeta fedayîye pa embaze Gulane dest pêkerde pa Derwêş, Zinar, Rojin, Eylem, Êriş û Andokan geş bîye. Xeta fedayîye şexsê embaze Gulane de bîye xeta azadîye.

Embaze Leyla Agirî ciwanîya xo de tewra têgêrayîşî bîye. Mi a 1996 de warê Rayberîye de şinasnaye. Embaze Leyla 30 serran warê gerîlatîye, fermandarîye, perwerdeyî de xebitîyaye. Aye xeta xoverdayîş û azadîye temsîl kerdêne. Embaze Hanime Yaverkaya 28ê hezîrana 1985î de şehîd bîye. Embaz Hogir, Xelîl, Îsmaîl hezîrane de şehîd bîyî. Ma deyndarê pêro şehîdan ê. Pê îdeolojîya xelisîyayîşê cinîyan bi hezaran milîtanî her warî de xo ver danê. Zîndanan de serê xeta Sara de, koyan de serê xeta Zîlane û Semayan de, mîyanê  hêzanê YJA-Starî de xo ver danê. Ewro gerîlayê azadîye vera hêrişanê dewleta tirke xeta Zîlane û Sema Yuce de xo ver danê. Ganî şarê ma her wextî ra zêdêr dormeyê gerîlayan de bibo çember.

Îzmîr de hêrişê vera bînaya HDPyî de Denîze Poyraz şehîd bîye. Keyeyê Poyrazî tedaya dewlete ra koçê Îzmîrî kerd û 3 domanê înan zîndan de yê. Denîze Poyraz sîyaseto demokratîk weçîna û xizmetê şarê xo kerd. Ma embaze Denîze bi rêzdarî yad kenê. Denîze şehîda xeta azadîye ya cinîyan a. Ez dadî û keyeyê aye selam kena. Şexsê keyeyê aye yê ercîyayeyî de şarê Kurdîstanî û Rayber Apoyî rê serweşîye wazena.

No hêriş hêrişêko normal nêbi. Îqtîdarî no hêriş plan kerd. No hêriş hêrişanê vera HDPyî, tecrîdê Îmraliyî û hêrişanê vera Herêmanê Pawitişî yê Medya ra cîya nîyo. Armancê nê hêrişî qirkerdiş bi. A roje qaşo uca de kombîyayîş estbi dima betal bi. A roje do 40 merdimî biameyêne kiştene. Şarê ma metropolan de binê tehlukeyêkê pîlî de yo. No hêriş têna vera HDPyî nê vera cepheyê demokrasî yo.

Ganî ciwan û cinîyê Kurdîstanî nê hêrişî ra fek vera nêdê. Ganî şarê Kurdîstanî, dostê kurdan, rêxistinê demokrasî pê tewirê Fehîme Poyraz têkoşîn bikerê. Ez reyna Denîze Poyraz bi rêzdarî yad kena, têgêrayîşê ma yê azadîye yê cinîyan do xeta şehîdan de şoro û ma do qetî qesasê şehîdan bigêrê.''