Goreyê xebera Ajansê Mezopotamya Buroyê Huqûqî yê Asrinî 24ê kanûne de seba ke 'erkê xo bi hawayêkê xirabî, vera qanûnî xebitnayî' Heyetê Dadger û Dozgeran (HSK) rê gerreyê dadger û dozgeranê mesuldaran kerd. Avûkatan waşt ke derheqê nê dadger û dozgeran de cade tehqîqat bêro akerdene.

25ê adara 2021î ra nata Rayberê Şarê Kurdî Abdullah Ocalanî û tepişteyanê bînan ê Îmraliyî Omer Hayrî Konar, Hamîlî Yildirim û Veysî Aktaşî ra xeberêke nêna girewtene. Muracatê pêvînayîşî yê keyeyan û avûkatan bêcewab yenê verdayene.

Avûkatan tewr peynî 8 serran da dima 2-22ê gulane, 12-18ê hezîrane û 7ê tebaxa 2019î de muwekîlê xo reyde pêvînayîş kerdbi. Cewab nêdîyeno muracatê pêvînayîşan.

Avûkatanê Buroyê Asrinî 22ê teşrîna peyênê de seba pêvînayîşî muracatê Dadgerîya Înfazî ya Bursa kerd. Muracatê avûkatan ame redkerdene û ame vatene ke derheqê Abdullah Ocalanî de di qerarê qedexeyê pêvînayîşî estê. Dadgerîya Înfazî ya Bursa vat 12ê teşrîna verêne de cezaya dîsîplînî ya 6 mengan dîyaya Abdullah Ocalanî coka nêeşkeno pêvînayîş bikero. Dadgerîye cewabê muracatê keyeyî de zî vat Serekîya Heyetê Dîsîplînî ya Mudirîya Dezgehê Ceza Înfazî yê Îmraliyî 18ê tebaxe de cezaya pêvînayîşê merdiman a 3 mengan daya. Dadgerîye vat seba ke cezaya qedexeyê pêvînayîşî yê 6 mengan seba avûkatan û 3 mengan zî seba merdimanê tepişteyan esta ê muracatê pêvînayîşî red kenê.