Hemserekê Kongreya Komelê Demokratîkî (KCD) Berdan Ozturk, Hemserekê Partîya Herêman ê Demokratîkan (DBP) Salîha Aydenîz û Keskîn Bayindir dewa Zêynanî ya qezaya Dara Hênî ya Çewlîgî û dewê Okçular û Saricanî yê qezaya Depe ya Xarpêtî zîyaret kerdî. Hemsereka HDPyî ya Çewlîgî Arzu Firat û Hemserekê HDPyî yê Depe Veysî Saritag û Wekîlê HDPyî yê Çewlîgî Erdal Aydemîr zî tewrê heyetî bîyî.

Hemsereka Pêroyî ya DBPyî Salîya Aydenîza ke zîyaretan de qisey kerd ard ziwan ke sebebê îmha, înkar û krîzan meselaya kurdî ya û vat: ''Polîtîkaya dewleta tirke se serrî yo sey xo ya.  Vanê têna tirk û sunî estê. Ê bîn pêro dişmen ê ke ganî bêrê çînkerdene. Îtîfaqê AKP-MHPyî zî pê na polîtîka xo weye keno. Nê sîstemî de cayê şaran, bawerîyan, cinîyan û ciwanan çîn o.  Heme polîtîkayî Zîndanê Îmraliyî ra dest pê kenê. Sîstemê Îmraliyî taybet o. Çîyo wînayên dinya de çîn o.  22 serrî yo Rayberê Şarê Kurdî Birêz Abdullah Ocalan uca de têna yew hucre de  vera nê sîstemî têkoşîn keno. Qeyûm, asîmîlasyon, çînkerdiş, qetilkerdişê cinîyan, yewbînaverdayîşê şaran nê pêro pabesteyê polîtîkaya tecrîdî yê.''

Aydenîze ard ziwan ke ganî semedê wedaritişê tecrîdî têkoşîn bêro kerdene û wina dewam kerd: ''Gama ke fikrê birêz Ocalanî vila benê komel nefes geno. Ma prosesê 2013-2015î  pêro pîya ciwîyayî. Ma dî ke pê fikranê birêz Abdullah Ocalanî yê derheqê Rojhelatê Mîyanênî, Tirkîya û Kurdîstanî mesela pê metodanê demokratîkan eşkena bêro çareserkerdene.  Seba ke demokrasîyî ra tersenê bêçareyîye kenê xorî û semedê şer û tecrîdî israr kenê.  Pê nê tecrîdî heme Tirkîya bîya zîndano akerde. Tepişteyî zîndanan de raştê muameleyê teberê merdimîye yenê.  Vera tecrîd û binpaykerdişê heqan 200 rojî yo tepişteyî grevê vêşanîye de yê.''

Aydenîze qiseykerdişê xo wina qedîna: ''6 serrî yo zextê vera şarî dilab-hîrlab zêdîyayo. Çîyo ke nê şarî nêdî nêmend. Rixmê nayî şarî emser Newroze û 8ê Adare de meydanî kerdî de û ramojna ke hema peyê têkoşînê azadîye de yo. Şarî mesaj da ke statu, ziwan û erdê xo canêverdeno. Coka ma zî sey sîyasetmedaran û dezgehan şarî heme herêman ra gêrenê şarî reyde yenê têhet ke xoverdayîşê xo pîlêr bikerê.''