Kelaya Çelê û banê kerrayînî yê tarîxî serê girêkê Çelê yê Colemêrgî de yê. Karê restorekerdişê kela û bananê kerrayînan têna bi 7 banan sînorkerde mendî. 7 banî ameyî kerdene otêla butîkî û restaurantî la taybetmendîyê înan ê tarîxî werte ra wedarîyayî.

Nê banê kerrayînî zêdêr diqat ê. Qata corine de cayê roniştişî û rakewtişî estê. Qata cêrine de zî kîler, banyo û lavabo estê. 2010 de Şaredarîya Çelê ya HDPyî seba restorekerdişê banan xîret kerdbi labelê Wezîrîya Kultur û Turîzmî verê xebate de bibî asteng. 21 bananê kerrayînan ra têna 7ê ci hetê wezîrîye ra ameyî restorekerdene. Labelê na xebata restorasyonî taybetmendîyê nê banan wedarnayî. 14 banî zî terkê rijîyayîşî ameyî kerdene.

Hemserekê HDPyî yê Çelê Îsmaîl Akkayayî pare kerd ke xebata restorasyonî goreyê taybetmendîyanê tarîxîyan nêameya kerdene û vat: ''Têna 7 banî restore bîyî. Xora eke armancê înan pawitişê bînayan ê tarîxîyan bibîyêne restorasyonê ci wina nêkerdêne. Nika 14 banî bi temamî rijîyayê.''