Endama Koordînasyonê KJKyî Besê Erzîncan serra 2021î hetê cinîyan û têgêrayîşanê cinîyan ra ANFyî rê ercnaye û bale ante armancanê 2022î ser.

Qiseykerdişê Besê Erzîncan ra beşêk wina yo:

''2021 Kurdîstan de bi xoverdayîşêkê pîlî derbaz bîye. Peymana Îstanbulî zî na serre wedarîyaye. 2021 de kiştişê cinîyan û şîdet zêdîyayî. AKP-MHPyî cinîyan sey objeyan û makîneya domanan vînenê. Êyê ke vera ney xo ver danê erzîyenê zîndanan. Ciwanî binê teda, fuhuş, narkotîk û ajanîye de verdîyenê. Şexsê cinîyan ê kurdan û ciwanan de dest nîyeno hîsanê azadîye yê komelî.

Dadîyê kurdî heta nika bîyî çimeyêkê girîngî yê xoverdayîşî. Xoverdayîşê ma şexsê nê dadîyan de her warî de pîl beno. Cinîyanê kurdan dejê pîlî antî, raştê qirkerdişî ameyî. La qeyî têkoşînî ra fek vera nêda û hertim mîyanê cuye de bîyî tewirêkê xurtî. Cezayê ke şexsê Leyla Guven û Ayşe Gokkan de dîyayî, vera cinîyanê rêxistinbîyayeyan, wayîrîradeyan ameyî dayene. Emser Meclîsê Cinîyan ê HDP û TJA karê girîngî kerdî, komelî rê rayberîye kerde û ganî no bêro xurtkerdene.

Cinîyê Rojawanî yewîya neteweyîye ya kurdan, Şorişê Rojawanî û mîyanê cinîyanê Rojhelatê Mîyanênî rê rayberîye kenê. Şorişê Rojawanî şorişê cinîyan o xora. Cinîyî bi hawayêkê aktîfî şoriş de ca gênê, benê çimeyê hêvîye. Rojhelatê Kurdîstanî û Îran de teda, şîdet û kiştişê cinîyan asta tewr pîle de yê. Rejîm wazeno pê dardekerdiş, îşkence û tepiştişî cinîyan terbîye bikero. Cinîyî her warî de pabesteyê camêrdan ê. Îran muxalefetê cinîyan ra zaf terseno. Coka bi hezaran cinîyî eştî zîndanan. Zeynepe Celalîyan zî nê cinîyan ra yew a ke bi rojan o tira xebere nêna girewtene. Cinîyê Rojhelatê Kurdîstanî ganî yewîya xo bîyarê ca û pîya bixabitê.

Başûrê Kurdîstanî de cinîyî wayîrê tecrubeyêkê girîngî yê cu yê, çêr ê. Eke Başûr de cinîyê kurd, ereb, tirkmen û sûryanî yew bibê  no do tesîrêkê xurtî bikero herême. Yewîya cinîyan zaf girîng a. Ganî cinîyî rêxistinîya xo ya xosere bîyarê ca û kongreya neteweyî ya cinîyan ê kurdan û Rojhelatê Mîyanênî bikerê. Bi nê hawayî vera xeta îxanet û ajanîye ya Başûrî tewiro tewr raştikên do bêro mojnayene.

Qirkerdişê Şingalî ra dima hişmendîya cinîyan bîye xurtêr. Şingal de seba cinîyan şerto bingeyî pawitiş û caardişê kultur û dînê êzidîyan o. Ganî cinîyê êzidîyî û şarê êzidîyan xo îdare bikerê. Ganî verî şarê Şingalî xo rêxistin bikero. Emser cinîyan ê kurdan ê Ewropa zî karê girîngî kerdî. Çar parçeyanê Kurdîstanî ra merdimê ma uca de estê. Coka cinîyê Ewropa bi rolêkê hîrayî têgêrenê.

2022 do biba serra têkoşînêkê pîlêrî. Cinîyî seba ke rejîmê AKP-MHPyî birijnê heta ci rê yenê wa bixebitê. Serra 2021î zaf zehmet bîye. Ma pê xoverdayîşê xo na serre ver bi na hete ante. Erdogan hema zî wazeno şarî bixapîno û newe ra îqtîdar bibo. Cinîyî qetî do verê ney de bibê astengîye. No îqtîdaro faşîst do bi xoverdayîşê rêxistinîya cinîyan birijîyo. Cinîyî do na serre hîna bi xurtî û qerardarî têbigêrê. Seba azadîya Rayberê ma, seba çareserîya meseleyanê cinîyan, seba cuyêka rûmetêne ya şarê ma ma do bi xurtî bixebitê. Ma serra 2022î ra hêvîdar ê. Ma do qetî ser bikewê. Nê esasî ser o ez serra 2022î Rayberê ma rê, cinîyan rê, şarê ma û şaranê ma rê fîraz kena.''