Rêxistina HDPyî ya Êlihî kongreya xo ya 4. kerde. Bi hezaran kesî tewrê kongre bîyî û sloganê ''Biciwîyo xoverdayîşê HDPyî'' qîra. Hemsereka Pêroyî ya HDPyî Pervîne Buldan, wekîlê HDPyî, endamê Têgêrayîşê Cinîyan ê Azadan (TJA), Meclîsê Mayanê Haştîye, Partîya Gelecekî û Partîya Demokrate zî kongre de amade bîyî. 

Pervîne Buldan kongre de qisey kerd û vat: ''Êyê ke wazenê HDPyî krîmînalîze bikerê wa bêrê tîya û nê şarî bivînê. Ma bi şima xurt ê, hêz û îradeyê xo şima ra gênê. Nê hêzê şarî ra vera HDPyî hêrişî yenê kerdene.  HDP hêvîya nê welatî ya. Têna yew partîye haştîye, demokrasî, azadîye, heq û huqûqî wazena, a zî HDP ya.

Birêz Ocalanî vatbi ke 'Hewteyêk bidê mi, ez do meseleya kurdan çareser bikera.' 6 serrî derbaz bîyî la vera ey tecrîd yeno caardene. Nêverdenê ke keye û avûkatê ci ey bivînê. Bi sebebanê keyfîyan Îmrali de tecrîd kenê. Tecrîd sûcê vera merdimîye yo. Ma nê sûcî qetî qebul nêkenê. Ganî tecrîd cade bêro wedaritene.

Ma reyna vanê ke seba weçînayîşê verwextî amade yê. Şarê Tirkîya weçînayîşî wazeno labelê îqtîdar seba ke do ser nêkewo weçînayîşî nêwazeno. Ma tîya ra zî veng danê ke eke şima pê xo bawer ê, bira weçînayîşî bigêrê. Ma hele bivînê tercîhê şarî çita yê. Siba yan zî bîr eke weçînayîşêk bêro kerdene zî HDP seba îdareyê welatî amade yo.''

Kongre de Huseyîn Sarik û Hurîyete Kaytar bîyî hemserekê neweyî yê HDPyî yê Êlihî.