Komeleyanê Elewîyan ê Demokratîkan (DAD) emser cemê Xizirî vera gefanê qaymeqamî Cemxaneyê Duzgun Babayî de girewt. Cemî ra dima netîcenameyê ''Komxebata Pîr û Anayan a Dêrsimî'' ame eşkerakerdene.

Cem pê gulbangê Pîrê Ocaxê Sînemîlî Tacim Bakirî dest pêkerd. Xeylêk ana, pîr, rayber û hemwelatîyî tewrê cemê Xizirî bîyî.

Cemê Xizirî ra dima netîcenameyê ''Komxebata 3. ya Ana û Pîran a Dêrsimî'' hetê endamê Ocaxê Şêx Çobanî  Zeynel Keteyî ra ame wendene.

Netîcename wina yo:

''-Ocaxê ma modelê ma yê rêxistinbîyayîşê xoserî yê. Berdewamîya nê sîstenî pawitişê bawerî û komelê ma de sebebê ma yê estbîyayîşî yo.

-Têkoşînê demokrasî de ganî elewîyî asta tewr berze de ca bigêrê, vateyê xo vajê, elewîtîye ganî nêbiba warê menfaatanê çewî. 

-Raya Heqîye/Elewîtîya Xizirî mîyanê xo de pêro berdewamîyan muhtewa kena. Raya ma raya yewî ya.  

-Vera asîmîlasyonî wa erkanî bi ziwanê dayîke bêrê caardene. 

-Pîr û anayî komelê xozayî yê. 

-Wa her pîr talîbanê xo reyde îkrar bîyaro, vejîyo meydanan.  

-Cîyakerîye edeb yan zî ziwanê raya ma nîya. 

-Rizagirewtiş wa bêro caardene. Viraştişê bîna û meqaman de wa no krîter bêro caardenene.

- Dewlete û îqtîdarî nêeşkenê bawerîya komelî temam bikerê. Bawerî îqraro komelkî yo. 

-Kok, vîr, kultur û cografyaya ma gefê çinbîyayîşî de têrî yê. Vera nê qirkerdişî mumkîn o ke ma bi îqrarê komelkîy û yewîye xo bipawê. 

-Vera ciwanan polîtîkayê ajankerdiş, asîmîlasyon û yozkerdişî yenê kerdene. Ciwanî eke xo rêxistin bikerê eşkenê verê nê kerdişan bigêrê. 

-Vera krîzanê sîyasîyan çareserîye bi yewîya cîyatîyan û koman mumkîn a. 

-Ma tecrîdê zîndanan qebul nêkenê. Wa cade binpaykerdişê heqanê tepişteyan biqedê. 

-Wextanê peyênan de vera mabedanê ma hêrişî zêdîyayî. Ma qet qebul nêkenê ke qaymeqamê Qisle pê çekan erzeno cemxaneyê ma ser. Mabedê ma mulk nîyê, mekanê Heqî yê. ''

Dima ke netîcename ame wendene qawut, germîya îmaman û loqmayî ameyî vilakerdene.