Gerîlayê HPGyî Zindan Yenî êlula 2021î de dewa Pirêjmanî ya qezaya Pîranî ya Amedî de pêkewtiş de şehîd bibi.  Rixmo ke keyeyî çend rey semedê girewtişê cenaza muracat kerd,  cenaza 7 mengan ra dima ameye dayene. 

Dayîka Zîndanî Menîce Yenî ya ke Ajansê Xeberan ê Mezopotamya (MA) rê qisey kerd ard ziwan ke cenazaya lajê ci zereyê qutîya nimitişî de teslîmê înan bîya û vat sebebê şehadetê ey yeno nimitene. Dayîke Menîce vat: ''Beno ke lajê mi pê çeka kîmyewîye kişt û seba ke rêçê ci bibê vîn badê 7 mengan daye ma. Belka weş tepişt û înan kerd lete lewarê. Dozgerîye sebebê mergî nimit, ma rê nêvat.''

Menîce Yenî wina dewam kerd: ''Ma par 9ê teşrîna peyêne de xebara şehadetê lajê mi girewt û cade muracatê Serdozgerîya Komare ya Pîranî kerd. Înan ma şawitî Serdozgerîya Komare ya Amedî. Dozgerîye vat sebebê mergî bewlî nîyo coka ê cenaza nêdanê. Nê mabên de ma çendna rey muracat kerd. Dima ra ma eşnawit ke cenaza şawita Îstanbulî. Babîyê lajê mi zî dima şi Îstanbul la destveng agêra. Badê 7 mengan înan semedê girewtişê cenaza venga ma da.''

Menîce Yenî  vat: ''Ma têna çar kesî şîyî la 20 wesayîtê polîsan, 2 wesîyîtê zirxin û 3 wesayîtê destbendkerdişî ma teqîpkerdêne. Hetê bînî ra qereqolê dewa ma Başnikî ra hergo telefon ameyêne vatêne cenaza mîyarê dewe. Gama ke ma şîyî Dezgehê Tipê Edlîyî (ATK) înan cenazaya lajê mi zereyê qutîya nimitişî de daye babîyê ci. Ez a hele bi slogana 'Şehîdî Nêmirenî' qîraya. Polîsan gajna mi fekê mi girewt. Ma binê ablûqaya polîsan de şîye dewe. Dewe de leşkeran tifingî teqnayî ke dewijan bitersnê. Barcî va xeletî bîya. Destûr nêdîya dewijî bikewê goristan û ma tezîye ronê.

Înan tim  ma ra vatêne bêrê verê berê HDPyî. La ma soz dayo tutanê xo ma do heta dalpaya peyêne ya gonîya xo wayîrê dewaya înan vejîyê û têkoşînê înan bidê domnayene.''