Bado ke artêşa tirke Garê de binkewt û peyser agêraye, hêzanê gerîlayan lazabez netîceyê prosesê Garê ercnayî. Kêmatîyê ke qewimîyayî û tedbîrê ke ganî bêrê girewtene heme waranê gerîlayan de cade gerîyayî dest. Di mengan de ganî amadekarîya xurte biameyêne kerdene.  Hetêkî ra dewleta tirke hêriş kerdêne hetê bînî ra hêzanê PDKyî saba ke îrtîbatê gerîlayan ê yewbînan bibirnê her çî kerdêne. Rixmê wextê tengî û hêrişanê PDKyî heme waranê gerîlayan de amadekarîye ameye kerdene. Hêzanê gerîlayan netîceya serkewtişê Garê de hem hetê moralî ra hem zî hetê terz û taktîkê gerîlayanê dewre neweyî ra avantajê pîlî fînayî dest.  Dewleta tirke ya ke Garê de vera  yewîyêka gerîlayan rixmê heme teknîkê xo binkewt tira heme xirabîye ameyêne pawitene. Hêzê gerîlayan heme waran de vera hêrişan amadebî. Heme waranê Herêmanê Pawitişî yê Medya de operasyonê hîrayî yê artêşa tirke ameyêne pawitene.

Hêrişê îşxalî yê neweyî

Vera herêmanê gerîlayan hêrişî zêdîyayî. 19ê nîsane de hêrişanê hewayî yê dest pêkerd. Têyarêyêkê şerî wiriştêne o bîn niştêne. Her roje 24 saete bi desan ÎHA û SÎHAyî serê waranê gerîlayan de gêrayêne. Xetanê sînorî ra bêmabên timûtim obus û havanî ameyêne eştêne. Şewa 23ê nîsane de artêşa tirke waranê Avaşîn, Zap û Metîna de operasyono hîra da destpêkerdene. Bombardumanê Tirkîya senî ke ver bi yew dewlete şer bikero bi.

Planî ameyî betalkerdene

Goreyê taktîkê dewleta tirke bombardumanê giranî sîstemê pawitişî yê gerîlayan şiknenê, derbeyî yenê pirodayene û leşkerî pê helîkopteran sirpilikanê berzan de yenê cakerdene. La gerîlayan pê çekanê giranan mudahale kerd û planê înan pûç vetî. Helîkoperî mecbur mendî ke peyser agêrê. Dewleta tirke hema deqayanê verênan de hêzanê gerîlayan ra derbeyî werdî û têna qismêkê yewîyanê xo tîya ca kerdî. Gerîlayan rixmê bombardumananê giranan bi sîstemê binî erdî û erazî de sey tîmanê wirdîyan hêzê xo pawit û sîstemê xo yê pawitişî xurtêr kerd. Leşkeranê ke derbeyî werdêne peyser ancîyayêne û newe ra bombarduman kerdêne. Gama ke leşkerî peyser ancîyayêne gerîlayî reyna binate ra bîyêne vînî. Hêzê gerîlayan ê tunelanê şerî û tîmê gerîlayan ê erazî bi hewayêkê koordînekerdeyî bêmabên çalakîyî kerdêne.

Serkewtişê dewrê neweyî

Artêşa tirke heme hêzê xo fînena dewre ke tîmanê erazî vila bikero û hêrişê tunelan bikero. Rewşe bi nimûneyêkî dahîna hole yena fehmkerdene; Avaşîn de di gerîlayî ke yewîya tirke teqîp kenê, ferq kenê kewtê mîyanê yewîya dişmenî. Wird gerîlayî verî bi taktîkê sabotajî yewîya dişmenî hedef genê û danê piro, yewîya dişmenî ke derbe wena yewna yewîye semedê hetkarîya ci yena. Wird gerîlayî danê na yewîye ro zî. Nê pêro yew roje de benê û bi desan leşkerî yenê kiştene.  Çar rojî heme teyarayê keşîfî cehd kenê ke înan bivînê la nêeşkenê cayê nê wird gerîlayan tesbît bikerê. Dima ra wird gerîlayî resenê yewîyanê xo. Na serebûte eşkera ramojena ke terz û taktîkê gerîyanê dewre neweyî resaya kamyew merhale û îradeyê merdimî/e senî eşkeno her çî bikero.

Hêzê Pawitişî yê Hewayî

Hêzanê gerîlayan bi şerê tunelanê şerî û tîmanê gêrayoxan heta mabênê gulane xoverdayîşêko xurt da û verê hêrişê îşxalê dewleta tirke girewt. Çalakîya Qilê Piramîtî yê Avaşînî ramojna ke pîya bi vergirewtişê hêrişan gerîlayî eşkenê operasyonanê şorişgêran zî bikerê. Gerîlan her game de xo aver berdêne, netîceyê çalakîyanê xo ercnayêne û çalakîyê bînî xurtêr kerdêne. Hetê bînî ra gerîlayan bi îmkananê xo hêzê xo yê hewayî aferna.  Hêzanê Pawitişî yê Hewayî yê Şehîde Delale bi çalakîyanê xo psîkolojîya leşkeranê tirke xeripnaye û qurfê artêşa tirke qerfina. Wesayîtê hewayî yê ke sîstemê pawitişî yê hewayî yê NATOyî dirna û çalakîyî kerdî belka têna aîdê Hêzanê Pawitişî yê Hewayî yê Şehîde Delale bî.

Çeke û gazê kîmyewîyî

Dewleta tirke roja 10. ya hêrişî de heme ercê merdimîye girewtî binê ligan û vera tunelanê şerî yê Memraşoyî pê çekan û gazanê kîmyewîyan hêriş kerd. Gerîlayan xora vera nê hêrişan tedbîrî girewtbî la tedbîranê Memraşoyî qîm nêkerd. Coka hêzê gerîlayan hema cigêrayîşê ci kenê. Dewleta tirke ya ke vera têkoşînê gerîlayan  bêçare mend, dest pê metodanê bêehleqan kerd ke nê pê belgeyan teqdîmê rayapêroyîye bîyî. Dewleta tirke heta mabênê gulane kerdêne ke hêrişê îşxalî hîra bikero la seba ke ser nêkewte narey kerd ke qilanê Mamreşo, Mervanos, Zendûra û Qela Bedewê de ca bidê xo. 1ê hezîrane de dewleta tirke waranê Dola Mara, Dola Konferansê û Tabûrê Ereban ê Avaşînî ra peyser agêro.

Dewleta tirke ya ke halê ci yê hêrişî nêmend gama ke  5ê hezîrane de PDKyî hêrişê Metîna kerd, 7ê hezîrane de reyna dest pê hêrişî kerd. Verî hêrişê Werxelê kerd dima ra hêrişê Girê Sorî kerd. Pê heme hêzê xo û çekanê kîmyewîyan hêrişê tunelanê şerî kerd. Rixmo ke dîmenê nê hêrişan ameyî parekerdene heme dewletî û dezgehî vera nê hêrişan bêveng mendî. No zî peyê zîyaretê Hulusî Akarî yê Berlinî fîneno çîman ver.

Dest pê xopawitişî kerd

Werxelê, Zendûra û Girê Sor de bi mengan têkoşîno destankî ame rayraberdene. Vera tunelanê şerî çeke kîmyewîyî û axûyînenî ke nêşuxulîyayî nêmendî.  Şero psîkolojîjk, bombardumanê giranî û madeyê teqnayîşî yê bi tonan hêrişî ameyî kerdene. Hêzanê gerîlayan tunelenê şerî de bi îradeyê xurtî û bawerî têkoşîno qerardar kerd. Gerîlayan bi tewiranê cîya cîyayan çalakîyî kerdî hêrişî pûç vetî. Dewleta tirke rixmê heme îmkananê xo vera xoverdayîşê gerîlayan nêeşkaye aver şiro. Werxelê, Tabûrê Ereban û Stûnê de mecbur mend ke peyser biancîyo. Netîceyê şerî yê serrêke ramojnenê ke gerîlayanê azadîye çîyo ke vanê qetî nêbeno kerd û ser kewt. Gerîlayan pê pratîk û têkoşînê xo ramojna ke senî rayîrê serkewtişî de gamanê pêtan erzenê. Hinî ne kalekolî ne teknolojîyê şerî û ne zî çekê kîmyewîyî eşkenê îşxalkeran bipawê. Çalakîya peyêne ya serre de no rehet yeno vînayene. Dewleta tirke 10 deqayan de Qilê Şehîd Munzurî yê Zapî ra ameye vetene. Leşkeran merde û malzemeyê xo yê leşkerî erdî de verdayî û remayî. Operasyonê şorişgêrî de vînîbyayeyê gerîlan çînê bî. Netîceya qetî do çirey mebedilîyo; serkewtiş ê gerîlayan o, çunke awe peyser nêherikîyena.