Meclîsê Ciwanan ê HDPyî pê şîarê 'Ciwanî ameyoxî ser o qisey kenê' Dêrsim de ciwanan reyde ameyî têhet. Hetkarê Hemserekanê HDPyî Tayîp Temel, Wekîlê HDPyî Alîcan Onlu û Dersime Dag zî tewrê aktîvîte bîyî.

Wendekare Sehere Akin nameyê wendekaranê Zaningehê Munzurî ser o qisey kerd û vat: ''Ma do vera polîtîkayanê bênasname verdayîşî, teda û kolonyalîzmê serê cinî û ciwanan têkoşînê rêxistinkerdeyî pîl bikerê. Ma do vera polîtîkayanê gemarinan tim hişmendîya cinîya azade bipawê.''

Wekîle Dersime Dag da zanayene ke yeno xîretkerdene ke ciwanî bêîrade bêrê kerdene û vat: ''Ewro hema zî ruhê xoverdayîşî yê Sakîne Cansiz Dêrsim de esto. Bi hezaran ciwanê kurdî hema zî vera polîtîkayanê dewlete xo ver danê.'' 

Hetkarê Hemserekanê Pêroyîyan ê HDPyî Tayîp Temelî ard ziwan ke  xoza û cografyaya Dêrsimî tim hêrişan de têrî ya. Temelî vat: ''Seyîd Riza û bi desan pîranê pîr û rayberanê Dêrsimî nê erdî de bedelê pîlî dayî. Ma zanenê ke nê erdî de omînê hemkaran tîya de nêgêno. Dêrsim kelaya peyêne ya Kurdîstanî ya. Ewro nê ciwanê ke tîya de kom bîyê hêzê ma eşkera kenê.'' 

Peynîya şayîye de hunermendî Kadîr Çat û Ayfere Duzdaş vejîyayî sehne ser.