Rojanê peyênan de hêrişê dewleta tirke ya îşxalkere yê vera Şingalî zêdîyayî. Hêrişê 7ê kanûne de Hemserekê Konseya Rayberdişî ya Îdareyê Xoserî yê Şingalî Merwan Bedel şehîd bibi û 2 rojan ra dima zî dewleta tirke bînaya Meclîsê Xanesorî dabî bombayan ver.

Roniştoxanê Kampa Multecîyan a Şehîd Rûstem Cûdîyî (Mexmûr) ANFyî rê qisey kerd û hêrişê vera Şingalî şermezar kerdî.

Dayîke Hacer Kara pare kerd ke dezgeh û sazgehê hukmatê Iraqî bi bêvengîye paştî danê nê hêrişan û vat: ''Wijdanê înan senî nê hêrişan verdenê? 3 mengî yo dadîyî Sêmalka de cenazayanê xo wazenê. La PDK nêdano. PDK bi nê hawayî eşkera keno ke o zî hemkarê dewleta tirke yo. Dewleta tirke wazena kurdî pêro çin bibê. La peynî de a do çin biba. Ma venga dezgehanê heqanê merdiman danê ke vera nê hêrişan vengê xo vejê.''

Dayîke Rûxweşe Efrîn zî îfade kerd ke sebebê nê hêrişan bêvengîya Iraq, PDK û welatanê dinya ya û vat: ''Ma sey dadîyan ney qebul nêkenê û paştî danê şarê Şingalî. PDK herinda ke vera DAÎŞî pêşmergeyan bişawo cayanê hêrişan pêşmergeyî şawitî waranê gerîlayan. Ma hêrişanê PDKyî yê vera gerîlayan şermezar kenê. Wa na dişmenîye ra fek vera bido. Ma venga pêro kurdan danê ke vera nê hêriş û kerdişan wurzê payan ser.''