Partîya Herêman ê Demokratîkan (DBP) 27ê sibate de kongreya xo ya 6. do bikera. DBPyî derheqê kongre de Amed de kombîyayîşêk kerd. Kombîyayîş de eşkerayîya tirkî û kurdkî hetê Hemvervatoxanê Komîsyonê Kongre yê DBPyî Adnan Akgul û Belgîne Dîken ra ameye wendene.

Eşkerayîye de ame vatene ke îqtîdarê AKP-MHPyî ra dişmenîya xo ya vera kurdan ra hêrişê her cayî keno û Vakurê Kurdîstanî de pê xoverdayîşî hêrişê AKP-MHPyî ameyê pûçkerdene. Eşkerayîye de wina ame vatene: ''Vateyê 'Tîya Kurdîstan o' adiro verên vist ta. Komelê Kurdîstanî raştî û nasnameyê xo de israr keno. Ma kongreya xo ya 6. de mesuldarîyanê pîlan do bigêra xo milî. Ma armanc kenê ke komelê azadîgîrê cinîyan, ekolojîkî û demokratîkî awan bikerê. Rejîm wazeno kurdan û Kurdîstanî çin bikero. O çax xoverdayîşî ra ber sewbîna yew rayîrê ma çin o. Ma do têkoşînê xo binetîce bikerê. DBP do Kurdîstan de rayberîya caardişê yewîya neteweyîye bikero.

Ma do sîstemê hemserekîye her beşî de bîyarê ca. Ciwanî, cinîyî, şexsê Ocalanî de zîndanî, kedkarî, sîyaseto demokratîk û pêro şarê kurdî xo ver danê. Seba ke kongreya ma ser bikewa her wextî ra zêdêr îmkanê ma estê. Nê esasî ser o ma venga pêro şarê xo danê ke kongreya ma de bêro pêser.''

Hemserekê DBPyî Keskîn Bayindirî zî îfade kerd ke kongreya înan do peynîya AKP-MHPyî bîyara û vat: ''Ma venga şarê xo danê ke tewrê kongreya ma bibo. Ma do a roje cewabêkê pîlî bidê faşîzmî.''

Hemsereka DBPyî Salîha Aydenîz vat: ''Nê welatî de tecrîdêko pîl esto. Ma do vera nê tecrîdî awanîya komelkîye newe ra awan bikerê. Ma do vera nê sîstemê faşîstî apey gamêke nêerzê. Ma pêro şarê xo dawetê kongreya xo kenê.''