Dêrsim de hûmara waqayanê vîrusê Korona zêdîyena. Hemserekê Sendîkaya Kedkaranê Weşîye û Xizmetanê Komelkîyan (SES) a Dêrsimî Kahraman Yurukî derheqê babete de PÎRHA rê qisey kerd.

Yurukî bi taybetî bale ante waqayanê varyantê Omicranî yê Korona ser û vat: ''Seba ke varyantê Omicranî hîna lez vila beno waqayê janî zî bi lezî zêdîyenê. Çend rojan de hûmara pozîtîfan bîye se ra 70 û nînan ra zî se ra 20ê ci varyantê Omicranî yê.

Dêrsim de hema hema se ra 90ê nufusî derzîne bîyo. Bi tesîrê derzîne sixletîya servîsanê ciewnîyayîşê giranî û nêweşxaneyan kêmîyena. Wezîrîya Weşîye wextê karantîna kerd 7 rojan, no zî eşkera keno ke wezîrîye wazena bedenê şarî bimuso vîrusî. Ganî şarê ma cayê qerebalixî de goreyê tedbîranê maske, mesafe û şertanê hîjyenî têbigêro.''