Tirkîya û Vakurê Kurdîstanî de polîtîkayanê AKP-MHPyî ra her ke şino krîzo ekonomîk beno pîlêr û erjê lîraya tirkan kêmîyeno. Krîzo ekonomîk polîtîkayanê şerî reyde beno pîlêr.

Şarê Dêrsimî ANFyî rê qisey kerd û ard ziwan ke rejîmê Erdogan ganî cade îdareyî rê şoro.

Ahmet Guzelo ke teqawut bîyo, pare kerd ke krîzê nikayênî têna pê demokratîkbîyayîşî eşkenê sereraşt bibê. Guzelî vat: ''Înan welat ard verê rijîyayîşî. Pêro warê karî ameyî rotene. Erdogan vano 'mi kitabê ekonomî nuşt.' Şar wina nêvano. Ê têna pere danê şer û rantî. Hele mende ke ma biteqê.''

Alî Hidir Çelîk zî teqawut bîyo, 74 serre yo û vano ke ê hînî nêeşkenê debara xo bikerê. Çelîkî vat: ''Rejîmê tekkesî welat qedîna. Heta ke no hukmat nêşoro çîyêk nêvurîyeno. Welat de her çi qedîyayo. Pêlekê ardan 160 lîra ra bîyo 300 lîra. Êyê ke bîyê belaya sereyê welatî 3-4 meaşan gênê.''

Adil Aydinî zî bale ante polîtîkayanê hukmatî ser û vat:''Şare ganî sere wedarno, vejîyo kuçeyan. Vaya sotemenîye her ke şino zêdîyena. Eke ma qisey nêkerê, tênêgêrê ma do nê polîtîkayan ra vêşanîye ra bimirê.''

Mehmet Ozguro ke sey karkerêkê bêsîgortayî xebitîyeno vat: ''Ez nêeşkena derguşê xo rê nan bera, nêeşkena pere bida domananê xo ke şinê dibistane. Nê rejîmî welat qedîna.  Erdogan budçe seba şerî şuxilneno. Hînî wextê ci ameyo ke Erdogan şoro. Wa şar nêrazîbîyayîşê xo bimojno.''