Dewleta tirke bi bahaneya multecîyan mabênê sînorê Rojhelat û Vakurê Kurdîstanî de dêsî virazena û wazena bi nê hawayî kurdan yewbînan ra biqerifna. Viraştişê dêsî 2021 de dest pêkerd. Wan de 45 kîlometreyê ci û Colemêrg de zî 16 kîlometreyê dêsî temam bîyo.

Qeyûmê Wanî Mehmet Emîn Bîlmezî derheqê babete de vat ke dêsî ser o têlî do bêrê cakerdene, serê sînorî de xendek do bêra viraştene û 217 kule, 2 qereqolî do bêrê viraştene. Na eşkerayîye ra dima 3 multecîyê afganî kewtî xendekî û merdî. 5 multecîyê afganî zî serê sînorî de cemidîyayî û merdî.

Dewleta tirke pê pereyo ke Yewîya Ewropa seba multecîyan dana, vera kurdan dêsî virazena. Hemsereka Komeleya Cigêrayîşannê Koçberîye ya Serhedî (Goç-Der) Gulşene Kurt derheqê babete de qisey kerd.

Gulşene Kurt vist vîrî ke seba multecîyan Tirkîya de statuyêko qanûnî çin o û vat: ''Polîtîkaya multecîyan a îqtîdarî qanûnî û huqûqî nîya, heqanê multecîyan binpay kena. Serê sînorî de cinîyan rê tacîz û tecawuzî yenê kerdenê. Tirkîya bi pereyê Yewîya Ewropa dêsan virazena ke merdiman eqrabayanê ci ra biqerifna. Verî ra nata merdimî serê sînorî de bazirganîye kenê. No heman wextî de çimeyê debarî bi la nika bazirganîye yena kerdene û merdimî serê sînorî de terkê vêşanîye yenê kerdene. Pê xîretanê winasênanê ke seba ke verê multecîyan bêro girewtene visîyayî dewre, merdimî yewbînan ra pê desî yenê cîyakerdene.''