Artêşa tirke hêrişê îşxalî yo ke 14ê nîsan a 2022yî de vera waranê Gerîlayanê Azadîye yê Kurdîstanî Zap, Metîna û Avaşînî da destpêkerdene de her qeyde çekanê kîmyewîyan şuxulnena. Îşxalkerê ke vera têkoşînê gerîlayanê HPG û YJA Starî nêeşkenê bikewê tunelanê şerî vera gerîlayan çekanê kîyewîyan şuxulnenê.

Artêşa tirke ya ke şertanê şerî yê mîyanneteweyî binpay kena û metodanê ke merdimîye qedexe kerdî şuxulnena hetê gerîlayanê ke herême de yê ra hêna dîmenê ci ameyî antene. Dîmenê ke binê şertanê zehmetan de ameyî qeydkerdene de yeno vînayene ke leşkerê artêşa îşxalkere vera tunelanê şerî yê Werxelê amadekarîya çekanê kîmyewîyan kenê.

Çend leşkerê tirkî tewreyê ke destê înan de yê erzenê  nizdîyê ber û pencereyanê tunelanê gerîlayan û leşkerêko bîn zî destê ci de xortimo ke hewayê tezyîqinî pijiqneno şino cayê tobeyanê ke ameyî eştene. Leşkerê bînî zî pa xortimê dergî ey teqîp kenê. Dima ra leşkerî ravêrenê peyê yew zinarî û malzemeyê ke destê înan de yê amade kenê û xortimî erzenî war.

Leşkerê tirkî yê îşxalkerî xortimî ca kenê ke mewzî û tunelanê gerîlayan pê gazê kîmyasalî pirr bikerê. Yew leweyê xortimî zereyê tunelî leweyê ci yo bîn zî Girê Werxelê rê yeno dergkerdene. Nê dîmenî mojnenê ke dewleta tirke semedê hêrişêkê wehşîyî amadekarîye kena.

Dewleta tirke goreyê serranê bînan şerê emserî yo ke herêma Zapî hedef geno de  dahîna zaf û cîya cîya çekanê kîmyewîyan şuxulnena. Nê gazê ke badê teqayîşî boya detarjanî vejenê sipî û gor ê. Goreyê gerîlayanê ke tunelanê de xo ver danê artêşa tirke yew çeka bîne zî  şuxulnena ke badê teqayîşî zelîqîyena tunelana û eke çew xo bileqina reyna aktîf bena. Nê gazî boya giranî verdene û nefesê gerîlayan birnenê.