Endamê Komîteya Perwerdeyî yê PKKyî  Mahîr Dogan Radîyoya Denge Welatî rê qisey kerd.

Doganî ard ziwan ke tecrîdê 23 serran ê serê Rayberê Şarê Kurdî Abdullah Ocalanî semedê bêvengkerdişê şarê kurdî û Rayberîya ci yeno kerdene û vat: ''Cehdkerdişê dewleta tirke bi têkoşînî ame  betalkerdene. No têkoşîn hinî pede pede dinya ra vila beno. Serra newî de do zafêr vila bo. Têkoşînê Rayber Apoyî cedhkerdişê dewleta tirke betal kerdî û nizdîbîyayîşê dost û doşmenî zî zelal kerdî.''

Doganî cenazayê ke zîndananê dewleta tirke ra vejîyenê sey ceribnayîşê qirkerdişî name kerdî û vat: ''Wazenê pê tepişteyan mesaj bidê şarê kurdî. Vanê eke şima azadîye biwazê, do peynîya şima zî wina bo. Vanê wayîrê zîndanan mevejê. La ê se kenê wa bikerê şarê kurdî ewro ra tepiya têkoşînê xo ra peyde game nêerzeno û xoverdayoxanê zîndanî bêwayîr nêverdeno. Amed û Wan de çalakîyî yenê kerdene la ganî çalakîyî bêrê xurtkerdene. Têna merdimê tepişteyan nê ganî heme şarê kurdî wayîrê tepişteyan vejîyo.''

Doganî bale ante hêrişanê vera HDPyî û kurdan ser û vat: ''Roniştişê Denîze Poyraz û tewr peynî hêrişê vera banê HDPyî yê Bahçelîevlerî de zî ame vînayene ke nê hêrişî bi destê dewlete yenê kerdene. Dewleta tirke kurdê/a azadî/e ra tesena, kurdê/a têkoşerî/e ra tersena coka hêriş kena. Ciwanî wayîrê tarîx, kultur û komelê xo vejîyenê. Coka Kobanê de ciwanî sey hedefê ameyî girewtene.''

Doganî çalakîyê serkewteyî yê gerîlayan vist vîrî û vat: ''Dewleta tirke ya îşxalkere hinî nêeşekna vera tempoyê gerîlayan xo bipawo. Coka xeylêk waranê gerîlayan ra xo peyser ante. Nê şerî de dewleta tirke eşkera bin kewt. Hukmatê AKP-MHPyî planî kerdbî ke verê vîjnayîşî gerîlayan çîn bikero. Dewleta tirke her çîyê xo semedê şerî xerc kerd û bin kewt.  Coka nika krîzê ekonîmî de ya. Xoverdayîş ser kewt, krîzê ekonîmî xorîn bi. Dewleta tirke do serra 2022î de her hetî ra bin bikewo. Şarê Kurdîstanî do serkêşîya gerîlayan de ser bikewo. No zî serkewtişê heme şaran o.''

Doganî  vist vîrî ke Rayberê Şarê Kurdî Abdullah Ocalanî vato 'Qirkerdişê Parisî dewamê Terteleyê Dêrsîmî yo, ez do vera nê hêrişî wayîrê xeta Sakîneyan vejîyê pê polîtîkayanê hêzdaran cewabê şima bidê' û vat: ''Rayber Apoyî mesajê qirkerdişî a roje fam kerd û cewabê ci da. Têkoşînê Azadîye yê Kurdîstanî û xeta têkoşînî pîlêr kerdî. Heta ewro na xete de xover dano û şarê kurdî zî kişta ci de yo. Roja ke ma tecrîd qedîna, azadîye qezenc kerd ma qesasê şehîdan genê û kiştoxan ra hesab persenê.''