Çalakgeranê grevê vêşanîye yê Mexmûrî, dîyar kerd ke seba azadîya fîzîkîye ya Rayber Apoyî çi destê înan ra bêro do bikerê û vat, ‘‘Dem demê vatişî nîyo, demê pratîkî yo. Eke ma vatiş û pratîkê xo bikerê yew, ma do tecrîdî bişiknê.’’
Şarê Wargehê Bextwaştoxan ê Şehîd Rustem Cûdîyî (Mexmûr) seba azadîya Fîzîkîye ya Rayber Apoyî û şiknayîşê tecrîdê giranî, 10 kanûne 2022î de dest bi çalakîya nobetî kerdbî. Çalakgerî 1ê sibate de çalakîya nobetî tada çalakîya vêşanîye ya bidore. Na çalakîye do heta 8ê adare 2023î dewam bikera. Çalakgerê grevê vêşanîye ANFyî rê qisey kerd.
‘Gere ma azadîya Rayberîye rê wayîr bivejîyê’
Dayîke Emîne Çelî dîyar kerd ke no 21 aşmî yo ke Rayber Apoyî ra xeberêke nêyena û wina vat, ‘‘Amancê çalakîya ma zî o yo ke ma Serekê xo ra agahîyêk bigîrê. Serokê ma seba ma maneyê her çîyî yo. Gere avûkat û keyeyê ey bieşkîyo ey bivîno. Gere şarê kurd seba Rayberîye sere wedarno û dest ra çi bêro gere bikero. bi taybetî şarê Vakurî gere HDPyî tena nêverdo. Gere ma çimanê xo akerê û gerîlayan û Rayberê xo rê wayîr bivejîyê.’’
‘Dem demê vatişî nîyo, demê pratîkî yo’
Hewar Gabarî zî no çî vat: ‘‘Seba azadîya fîzîkîye ya Rayber Apoyî û şiknayîşê tecrîdî destê ma ra çi bêro ma do bikerê. Bawerîya ma est a ke, eke ma xo baş rêxistine bikerê û bibê yew, ma do nê tecrîdî bişiknê û Serokê bi hewayêko fîzîkî azad bikerê û ser bikewê. Dem demê vatişan nîyo, demê pratîkî yo. Eke ma vatiş û pratîkanê xo bikerê yew, ma do ser bikewê.’’
