Endama Koordînasyonê KJKyî Besê Erzîncan ANFyî rê qisey kerd û rojdem ercna. Erzîncane verî serrgêra 43. ya ronayîşê PKKyî fîraz kerde.

Qiseykerdişê Erzîncane ra beşêk wina yo:

''Rayber Apoyî ronayîşê PKKyî de girîngîyêka pîle daye temsîlê xeta azadîy cinîyan. Seba averberdişê rêxistinî û xeta azadîye ya cinîyan tim pê PKKyî hemle daye destpêkerdene. Cinîyî pê tewrbîyayîşê PKKyî resayî cewherê xo, potansîyel û hêzê xo şinasnayî. Asta cinîyan ê kurdan ewro resaya a aste e hetê Rayberîye ra ameye afernayene. Coka ronayîşê PKKyî cinîyan rê bi estbîyayîşo newe. 

Sebebanê tewr pîlan ê Komployê vera Rayberîye ra yew zî no bi ke ey cinîyî koletîye ra xelisnayî. Xeta azadîya cinîyan a Rayberîye bîye sebebê ters, nêrazîbîyayîş û hêrs pîl ê sîstemê serdestîya camêrdan. Rayberê ma rayîr û metodê azadîya cinîyan mojnayî. Cinîyan ê kurdan bi çêrî vera DAÎŞî şer kerd û xo verda, nê pêroyî berhemê Rayberîye bîyî. Rayberê ma raştîya cinîya azade afernaye, şorişo tewr radîkal ê seserra 21. rayberîya cinîyan kerde. 

Cinîyî seba azadîya Rayber Apoyî pê rolê serekeyî têgêrenê. Têgêrayîşê Azadîya Cinîyan ê Kurdan  azadîya Rayber Apoyî sey rojdemê xo yê bingeyînî ercnenê. Sebebê cezaya qedexeyê pêvînayîşan ê 6 mengan tewirê Rayber Apoyî yo. Dîktatorîya AKP-MHPyî key teng bena hêrişê Rayber Apoyî kena, ci rê tecrîdê giranî ferz kena. Vera net Rayber Apo xoverdayîşêkê pîlî keno. Sere de CPT Ewropa tim vera tecrîdî bêveng mende. Ê çareserîya meseleya kurdan nêwazenê. Firkê Rayber Apoyî pêro dinya rê vila bîyî. Rayberê ma bîyo Rayberêko global. Hemleyê ma 'Wextê Azadîye' û 'Vera qirkerdişê cinîyan wext wextê pawitişê cinî û komelê azadî yo' hîna xurt do bêrê kerdene. 

Mîyanê lîsteya terorî de veradayîşê PKKyî şermêko pîl o. Welatê Ewropa û Amerîka pê astengkerdişê PKKyî wazenê Rojhelatê Mîyanênî de kolonyalîzmê xo rê dewam bikerê. NATO zî nê sebebî ra paştî dano Tirkîya. Ewro dinya ser de xeylêk roşnvîr, sîyasetmedar, rojnameger û nuştoxî wazenê ke PKK mîyanê lîsteya terorî ra bêro vetene. Çimê dinya de PKK ewro wayîrê îtîbarêkê pîlî yo. Coka nêbeno ke PKK mîyanê na lîste de bibo. Cinîyî vera ney ganî têkoşînêkê pîlî bikerê û na babete bikerê rojdemê xo yê serekeyî.

Dinya de krîzî verî tesîrê cinîyan kenê. Têkoşînê ma yê cinîyan ê kurdan pê Şorişê Rojawanî resayo astêka pîle û dinya rê vila bîyo. Ganî pêro dinya de têkoşîn û yewîya cinîyan bêrê xurtkerdene. Vera hêrişan û şîdetê camêrdan têkoşînê azadîya cinîyan girîng o. Cinîyî ganî hînî têna seba destvistişê tay heqan nê seba armancanê pîlan têkoşîn bikerê. 

Dîktatorîya AKP-MHPyî pê hêrişanê vera Vakur, Başûr û Rojawanê Kurdîstanî wazena emrê xo derg bikera. La hînî mumkîn nîya ke hişmendîya înan payan ser o vindera. Komelê Tirkîya mîyanê krîzêkê pîlî yê ekonomîkî de yo. Komel hînî nê îqtîdarî nêwazeno. Eke muxalefetê Tirkîya rayberîya komelî bikero no îqtîdar qetî do şoro. Cinîyî zî ganî do bibê rayberê çalakîyanê muxalefetî.

Erkê cinîyan ê kurdan o ke rayberîya têkoşînê demokrasî û azadîye bikerê. Ma ganî Vakur, Rojhelat, Rojawan û Başûr de rayberîya çareserîya meseleyanê demokratîkbîyayîşî û neteweyîyan bikerê. Cinîyê kurdî wayîrê tecrubeyanê pîlan ê. Dîktatorîya faşîste ya AKP-MHPyî bi zorî payan ser de vindena. Ganî cinîyî, bawermendî, kedkarî, ciwanî û bindestî pîya têkoşîn bikerê û na dîktatorîye bin bikerê. Hînî kes nêeşkeno verê waştişê azadîya cinîyan bigêro. Ez venga her kesî dana ke têkoşînê ma yê azadîye pîl bikero û tewrê hemleyanê ma bibo. Eke rayîr û metodê raştikênî bişuxilîyê û têkoşînê winasêno do bêro kerdene serkewtiş do bibo ê cinîyan û şaran.''