Herêma Kurdîstanê Federeyî de Mazlûm Dag û Abdurrahman Er dima ke 17ê temmuza 2019î de elemanê MÎTî Osman Kose Hewlêr de kişîyabi ameyî tepiştene û cezaya îdamî dîyaye înan. Dîya zanayene ke Zîndanê Hewlêrî de Mazlûm Dag û Abdurrahman Er vera binpaykerdişê heqan 8 rojî yo rojeyê mergî de yê.

Dag û Erî ewro keyeyanê xo de bi telefonî qisey kerd û pare kerd ke seba ke zîndan de heqê înan yenê binpaykerdene û cewab nêdîya waştişê înan ê vurnayîşê zîndanî înan 13ê sibate de dest pê rojeyê mergî kerd.

Dag û Erî îfade kerd ke înan derheqê binpaykerdişê heqan de selahîyetdaranê asayîşî de qisey kerd û selahîyetdaran înan rê vato ''Seba  ke şima dîplomat kişt ma nînan kenê.''

Keyeyan ard ziwan ke rewşa weşîya Er û Dagî bena xirabêre, 8 rojan de înan 10 kîloyî dayî, fekê înan ra gonîye yena. Keyeyan venga rayaumûmîye da ke wa derheqê babete de hîsger biba.