Qezaya Erdişî ya Wanî bi şîarê ''Wext wextê serkewtişî yo'' adirê Newroze ame tafînayene. Şarê Gelîya Zîlane ke saetanê serê sibayî ra verê xo da warê Newroze di nuqtayanê cigêrayîşî ra ravêrt.

Rixmê hewayê serdinî bi des hezaran  kesan warê Newroze kerd pirr. Dayîkanê Haştîye zî vernîya warê Newroze de cayê xo girewt. Şayîye bi rêzgirewtiş û wendişê Çarxa Şoreşê dest pêkerde û sloganê azadîye bîyî berz.

Bi nameyê Komîteya Amadekarîye Nîhat Macîtî Newroze şarî fîraz kerd û vat Newroze roşanê ganîbîyayîşî yo.

Hemserekê HDPyî yê Qeza Bayram Çîçekî zî vist vîrî ke Erdîş de badê panc serran adirê Newroze yeno tafînaye û vat wext wextê xelisîyayîşê şarê kurdî yo.

Hemşaredara Erdişî Yildize Çetîna ke wezîfeyê ci amebi xespkerdene bale antê qeyûman û binpaykerdişê îradeyê kurdan ser û vat bi têkoşînî do dêsê zîndanan bêrê rijnayene.

Hemsereka HDPyî ya Bajarî Handane Karakoyon zî ard ziwan ke Newroze vera qirkerdişê vera kurdan roja ganîbîyayîşî ya.

Hemşaredarê Şaredarîya Pîlî ya Wanî Mustafa Avciyo ke wezîfeyê ci amebi xespkerdene vist vîrî ke Newroze vera zulmî serewedaritiş o û vat kurdî bi yewbîyayîşî eşkenê ser bikewê.

Badê qiseykerdişan Koma Aryene deyîrî vatî. Pîya bi deyîran adiro verên ê Newroza Serhadî ame tafînayene û govende ameye girewtene.