Çewlîg de wayîranê dikanê berberî Sadîm Balat û Erhan Bayantemurî seba ke vera faturaya girane ya ceyranî nêrazîbîyayîşê xo bimojnê fatura camî ser o daliqnabî û ''Şelênayîş esto, Zulmê TEDAŞî rê nê'' nuştbi.

Dima ke çalakîya berberan xeylêk eleqe dî esnafanê bînan zî faturayê xo ardî û heman camî ser ra daliqnayî.

 Hetê bînî ra Mudirîya Pêroyîye ya TEDAŞî zî berberan rê telefon kerd û vato ceyranê herême destê Aksa Firat Elektrîkî de ya. Narey berberan afîşê xo ser de wina nuşt: ''Ma şelênenê. Zulmê Aksa Firatî rê ney.''

Sadîm Balatî ard ziwan ke 3 kesî dikan de xebitîyenê û vat: ''Gure çin o, dikan veng o. Ma hewteyê verênî de vewre ra dikan qefilnabi. La faturaya ma hezar û 100 TL ameya. Dikanê ma de makînaya fonî ra ber çîyêko ceyranîn nêşuxilîyeno.''

Balatî qiseykerdişê Serekkomar Erdoganî yê serê faturayan vist vîrî û vat: ''Wa bêrê faturayanê ma bidê. Her çi zaf bîyo vay. Kar çin o. Eke ma zem bikero o çax muşterîyî nênê.''  

Erhan Bayantemurî vat: ''Dikanê ma 8 metrekare yo. Gure çin o la fatura zaf a. Ma şaş mendî. Ma seba ke fatura zaf nêra pê montan xebitîyenê, soba anêkenê. Mi seba ke reaksîyonê xo bimojna 'Şelênayîş esto' nuşt û darde kerd. Nê dizd ê.'' 

Mîkaîl Bozano ke dikanê berberî de xebitîyeno vat: ''Nê pêro polîtîkayanê şaşan ê hukmatî ra yê. Wazenê ma bi nê hawayî terbîye bikerê. No sîstem do wina dewam mekero.''

Cuma Karaaslano ke verê dikanî ra şîyêne vat: ''No nêrazîbîyayîşêko cidî yo. Eke hende çêr ê wa KDV bikêmînê.'' 

Hemwelatîyêkê bînî zî vayî sey ''bêedaletîye'' pênase kerdî.