Teyarayanê şerî yê dewleta tirke ya îşxalkere saetanê şanî de bînaya Meclîsê Şarî yê Xanesorî daye bombayan ver. Hetkara Hemserekanê Îdareyê Xoserî yê Şingalî Sêvê Emo ard ziwan ke vera hêrişanê dewleta tirke ya îşxalkere ganî şarê êzidîyî wurzo payan ser.

Emoye îfade kerd ke seke yeno dîyene reyna teyarayanê şerî hêrişê Şingalî kerd û vat: ''Cayo ke dîyayo bombayan ver bînaya Meclîsê Şarî ya. Bînayêka sivîl a ke siba do tede seba Merwan Bedelî merasîmê yadkerdişî biameyêne kerdene.''

Emoye vera qirkerdişê êzidîyan venga rayaumûmîye da û vat: ''Ganî şarê êzidîyî wurzo payan ser. Kesê ke hêriş kenê dişmenê êzidîyan ê. Her roje êzidîyan qir kenê. Tîya de PKK çin o. Ganî êzidîyî vera nê hêrişan wurzê we û çalakîyan bikerê. Zulmî rê vajê bes o.''

Şingalijan vera hêrişan tewirê xo mojna û venga her kesî da ke vera hêrişanê serê êzidîyan tewrê xoverdayîşî bibo.