Partîya Herêman ê Demokratîkan (DBP) bi eşkerayîya kîtlekî bale ante serê polîtîkaya şerî ya dewleta tirke û PDKyî ser. Cayê eşkerayîyê Kuçeya Sanatî yê Yenîşehîrî yê Amedî saetanê serê sibayî ra gerîya binê ablûqaya polîsan û dekewtiş vejîyayîş ame qedexekerdene.

Îdarekarê DBP, KCDyî û HDPyî, aktîvîstê TJA, endamê Meclîsê Mayanê Haştîye zî tede bi seyan kesî tewrê eşkerayîye bîyî. Şaro ke polîsan nêverda bikewo Kuçeyê Sanatî bi slogananê ''Wa Biciwîyo Rayber Apo'', ''Wa biciwîyo yewîya kurdan'', ''Wa biciwîyo yewîye, bimiro xayînîye'', Wa biciwîyo xoverdayîş, biciwîyo Kurdîstan'' vera parka Ofîsî rayraşîyayîş kerd. Rixmê mudaxaleyê polîsan tîya pankarta Dem demê yewîya neteweyîye û azadîye yo ameye akerdene û eşkerayîye dameye dayene.

Eşkerayîye de wina ame vatene: ''Rewşa ke demo peyên de Başûrê Kurdîstanî de mabênê hêzanê kurdan de ciwîyaye ra ma qerqilîyenê. Demê wina hesasî  ke dengeyê herême newe ra bedilyene de pênêkerdişê kurdan, şarê kurdî rê dano vînîkerdene. Ewro kurdî her wextî a azadîye ra nizdî yê. Kurdî badê têkoşînê bi des serran ver bi azadîye şinê. Wina demê tarîxî de polîtîkaya îşxalkeran a vera yewbînanardirşê kurdan xorîyêr bîye. Eke kudî vera yew bînan şer bikerî sey vizêrî ewro zî do îşxalkerî ser bikewo û kurdî vînî bikerê.  Heme hêzanê kurdan ra waştişê ma oyo ke wa semedê serekwtişê kurdan têkoşîn bikerê.

Ma reyna bifinî vîrî ke her hêzo ke semedê azadîya şarê kurdî û dewaya ci ya biheqe têkoşîn keno heme Kurdîstan de hêzo meşru yo. Coka ganî qet yew hêzo ke Kurdîstan de têkoşîn keno sey îşxalkerî nêro namekerdene. Ganî qet çew/e ameyoxê şarê kurdî teslîmê destanê dewleta tirke mekero. Herinda naye de ganî vera îşxalkeran tewiro hempar bêro girewtene. Her rengê sîyasîyî yê kurdan zengînîya ci ya. Hêzê dewaya kurdî û têkoşînê azdîye yo. Hetê rêxistinkî ra cîya fîkîryayîş çîyêko normal o.  Rayîrê çareserkerdişê meseleyan dîyalog û muzakereyî. Qet yew hêzo ke bi nameyê şarê kurdî têgêreno heqê ci çîn o ke destkewteyê kurdan ê ke bi bedalanê pîlan ameyî qezenckerdene, bifîno tehluke. Ma veng danê heme rêxistinanê kurdan, şexsîyetan, roşnvîran, rêxistinanê demokratîkan ke wa bi hesasîyet têbigêrê. Seba ke pêkewtişê zereyî ma rê zaf pîl danê vînîkedene, ma zaf tuj vera ci vejîyenê û semedê çareserkedişê meseleyan, ma her hetan dir pêvînayîş û afernayîşê şeranê muzakereyî sey wezîfe vînenî.''