Çalakwana sivîle Neqîya Skender a ke beşdarê komxebata Meclîsê Xoserîya Demokratîk a Şingalî ke bi nameyê ‘‘Çareserîya Problemanê Iraqî Neteweya Demokratîk de ya’’ bîye, ANFyî rê qisey kerd.

Neqîya Skender bale ante serê halê Iraqî ke heqê kêmneteweyan Iraqî de çin o. Skendere wina dewam kerd; ‘‘Dewleta nikayine heqê kêmneteweyan nêpawena û peygoş kena. Sere ke şarê êzîdî û heme heqê şaranê kêmneteweyan peygoş kena.’’

Skendere ard ziwan ke eger dewlete wazena rast nêzdî biba, wa Şingalî newe ra awan bikera û vat, ‘‘Eke nêeşkena Şingalî newe ra awan bikera, wa koçberan bierşewa warê înan, yan zî wa qederê kêna û lajanê êzîdîyanê ke destê DAÎŞî de yê, bivîna û înan bîyara keyeyê înan. Eke nêeşkena ney zî bikera, wa fek Şingalî ra verda. Çunke ê bi xo eşkenê xo îdare bikerê û qederê xo bivînê’’

Skendere peynîya qiseykerdişê xo de dîyar kerd ke komxebata Neteweya Demokratîke eşkena biba çareserîya problemanê Iraqî.