Çarçewa Hemleya Şorişgêre ya Bazanê Zagrosî de warê Ertûşî yê herêma Zapî de menga kanûne de vera leşkeranê tirkan ê îşxalkeran operasyonêko şorişgêr ame kerdene. Vera hêrişanê artêşa tirke bi taybetî waranê Cîloyê Biçûkî de rayberîya şehîd Bawer Deyndar û şehîde Ronahî Xelîl de xoverdayîşêko destanwarî amebi kerdene.

Gerîlayan seba ke qesasê embazanê xo yê şehîdan bigêrê menga kanûne de warê Cîloyê Biçûkî de xeylêk çalakîyî kerdî. Gerîlayanê HPGyî Delîl Amed û Şaho Qendîl ê ke Operasyonê Şorişgêrî yê Zapî de bîyî, ANFyî rê qisey kerd.

Şaho Qendîlî vat: ''Warê Cîloyê Biçûkî de çalakîyî ameyî kerdene. Ez zî tewrê nê çalakîyan bîya. Rixmê teknîkê dişmenî zî gerîlayan derbê dayî dişmenî ro û pêro embazî bi serkewtişî agêrayîş baregehanê xo. Destê dişmenî de tekîn esto. La gerîlayan ra yew zî bimano heta peynî do vera dişmenî şer bikero. Vanê ke 'Ma gerîlayî qedînayî.' O çax nê merdimê ke hê eyaletan de şer kenê kam ê? Ma do heta çilka peyêne ya gonîya xo, xo ver bidê û leşkeranê dişmenî erdê xo ra vejê. Mesele kiştişê leşkeran nîya, bawerî û îradeyê gerîlayan o.''

Delîl Amedî vat: ''Ez 5ê kanûne de çalakîya Cîloyê Biçûkî bîya. Ma di baskan ra çalakîye kerde. Wextê keşfî de bala mi ante ke dişmenî xo pê teknîkê NATOyî û sîstemê mobese pirr kerdbi. Her roje drone û teyarayê keşfî girêkî ser o gêrenê. Heta ke ke leşkerê tirkî tîya de bimanê ma do çalakîyan bikerê. Ma vera teknîkê dewlete çalakîya xo kerde. Ma di çeperan ra da leşkeranê tirkan ro û dima bi serkewtişî agêrayî wargehanê xo. Artêşa tirke her roje nê waran de derb wena. Çalakîyan ra dima ê bombardumanêkê hende giranî kenê ke çew vano qey verê înan de artêşêka pîle esta. La êyê ke çalakîyan kenê 3-4 gerîla yê. Ma do bikerê ke leşkerê tirkî bi temamî xo apey biancê. Ma do na serre bikerê serra serkewtişî.''