Gerîlaya YJA Starî Kajîne Brusk hêrişê dewleta tirke yê vera Avaşîn, Metîna û Zapî û xoverdayîşê gerîlayan ê vera nê hêrişanANFyî rê erjna.

Kajîne Brusk ard ziwan ke dişmen seba ke kurdan û gerîlayan çîn bikero heme îmkanê seferber kerdî û vat:'' Bitaybetî emser vera Herêmanê Pawitişî yê Medya û serranê verênan de zî vera Efrîn û Sereêkîyê dişmenî çekê kîmyewîyî şuxulnayî.  Heme şeran de şuxulnayîşê çekanê kîmyewîyan qedexe yo. Vera tîmêkê gerîlayan bi seyan teqaber, çekê kîmyewîyî û qedexeyî yenê şuxulnayene. La têkoşîn û fedakarîya gerîlayan hêrişanê dişmenî betal keno.''

Kajîne Brusk vat: ''Sere de Amerîka û dewlete Ewropa hêzê mîyanneteweyî vera şuxulnayîşê çekanê kîmyewîyan bêveng ê. Halebçe de pê kîmyewî panc hezar kurdî ameyî kiştene. Çekê kîmyewîyê ke dewlete tirke şuxulnena bedenê merdiman û xoza ser senî tesîr keno nîno zanayene. Dişmen hinda nêeşkeno verê têkoşînê gerîlayan bîgêro, şaş bîyo mendo, nêzano  se bikero. O zano ke peynîya ci nizdî ya.  Dewleta tirke seba ke vera gerîlayan binkewta çekanê kîmyewîyan şuxulnena.  La wa dişmen nê bizano ke ne eşkeno gerîlayan ne PKKyî çîn bikero. Ma do tim nê koyan bibi.''

Gerîla Kajîne bale ante hêrişanê ke Herêmanê Pawitişî yê Medya de dewam kenê ser û vat:  ''Waranê Zap, Avaşîn û Metîna de şerêko gird est o. Dişmen her hetî ra bi çekanê kîmyewîyan hêrişê gerîlayan keno, hetêkî ra zî hêrişê şarî keno, zilm keno. Vakur de bi hezaran  kesî vera şuxulnayîşê çekanê kîmyewîyan wiriştî payan ser. Dewleta tirka ke îrade û hêzê kurdan ra tersena, wazenê bi zextî verê şarî bigêro. Vera hêrişan gerek şar û gerîlaya pîya têbigêrê. Sey gerîlaya YJA Starî ez şarê ma yê xoverdayoxî tîya ra silam kena.  Ma do heta peynî herre û şarê xo bipawê. Wa nê ra qet şikê çewî çînêbo.''