Gerîlayanê HPG û YJA Starî ard ziwan ke kurdî bi guleyê verênî yê 15ê Tebaxe newe ra wirişt payan ser û vat no bi hêvîya şarî. Gerîlayan Hemleya 15ê Tebaxe ercnaye.

Gerîlay YJA Starî Edûlê Şahîn sere de Roşanê Ganîbîyayîşî yê 15ê Tebaxe pîroz kerd û vat:  ''Hemrayê ma Zap, Avaşîn, Metîna û Xakurkê de bi ruhê Egîdan vera dewleta tirke ya îşxalkere şer kenê, vera çekanê kîmyewîyan xover danê. Ma sey gerîlayanê YJA Starî zanê ke ma eşkenê bi felsefeya Rayberê Apoyî dişmenî bin bifînê. Ma do bi têkoşînî tecrîdî zî biqedînê.''

Gerîlayê HPGyî Welat Cûdîyî zî bi wesîleya 15ê Tebaxe heme şehîdî yad kerdî û vat: ''Xoverdayîşo ke guleyê verênî yê fermandar Egîdî vera zulm û îşxalî dîya destpêkerdene ewro dewam keno. Ewro Zap, Avaşîn û Metîna heme Herêmanê Pawitişî yê Medya de gerîlayî têkoşînê bêhempa danê. Têkoşîno ke bi felsefeya Rayber Apoyî ame  averberdene resayo asta tewr berze. Sere de tunelanê Zendûra, Tepê Cûdî û Tepê Hakarî de embazî derbeyê pîlî dayî dişmenî ro. Rixmo ke dişmenê çekanê qedexeyan şuxulneno gerîlayî vera ci têkoşînê rumetî kenê. Ganî şarê ma zî paştî bido xoverdayîşê gerîlayan û her warî de têkoşîn bikero. Waştişê ma oyo ke ma bi pîlkerdişê xoverdayîşî tecrîdî bişikinê û zulmê serê şarê ma biqedînê. Ma do wayîrê keda hemrayanê xo yê şehîdan vejîye û sozê serkewtişî ke ma dayo înan bîyarê ca.''

Gerîlaya YJA Starî Berfîne Pinar ard ziwan ke Hemleya 15ê Tabaxe tarîxê PKKyî de prosesêko newe da destpêkerdene û vat: ''Mîlîtanê Rayber Apoyî ewro bi ruhê xoverdayîşî yo ke hemra Egîdî aferna têkoşîn kenê. Gerîlayê azadîye hêrişê çekanê kîmyewîyan ê dewleta tirke zî betal kenê. Dewleta tirke nêeşkena vera gerîlayan şer bikero. Hêrişê ke vera şarî kena zî mojnenê ke senî rewşa zore de ya. Bi hêrişê Zaxoyî zî înan binkewtişê xo îspat kerd. Dewleta tirke pê teknîkî hêriş kena la xo vîr ra kena ke gerîlayî bi felsefeya Rayber Apoyî û ruhê Zîlane, Bêrîtne û Egîdan xover danê. Şarê kurdî bi seredaritişanê xo yê verînan tecrube fîna dest. Ewro bi îdeolojîya Rayber Apoyî ma têkoşîn kenê. Ma wazenê ke dişmenê îşxalker û hêrişkaî  herra xo ra vejo. Ma do xeta hemra Egîdî de têkoşînî xurtêr bikerê.

Gerîlayê HPGyî Bahoz Hewlêrî zî ard ziwan ke guleyo verên o ke fermandar Egîdî 15ê Tebaxa 1984î de eşt zaf muhîm o û vat: Na hemle hem hetê sîyasîyî ra hem zî hetê leşkerî ra hemleyêka zaf bitesîre bî. Bitaybetî hetê leşkerî ra zaf muhîme bî. Embazî o wext reya verêne kewtî baregehê dişmenî û destna çekanê înan ser. Şaro ke bêhêvî mendbi bi guleyê verênî hêzê gerîlayan dî. Şarî dî ke gerîlayî barê Kurdîstanî kirişenî, şarê kurdî pawenê û azad kenê. Ewro no xoverdayîş Zap, Avaşîn, Metîna û Xakurkê de dewam keno. Gerîlayê ke vera teknolojî û çekanê kîmyewîyan ê dişmenî şer kenê, her roje derbanê pîlan danê dişmenî ro. Ma do sey hemrayanê embaz Egîdî têkoşînê xo xurtêr bikerê, dewleta tirke bin bifînê û Rayber Apoyî azad bikerê. 15ê Tebaxe ganîbîyayîş o, azadîye û hêvî yo.''