HDP’yî seba weçînayîşê cayîyan ê 31’ Adare Gimgim de mîtîngêk viraşt. Hemserekê DBP’yî Mehmet Arslan mîtîng de qisey kerd û vat, “Heme Kurdî bi taybetî Kurdê ke şehîd û adetê xo pawenê, do reyêk zî nêdê tifaqa AKP-MHP’yî.”
HDP’yî çarçewaya xebatanê weçînayîşî de qezaya Gimgimî ya Mûşî de mîtîngêk viraşt.
Hemserekê DBP’yî Mehmet Arslan, Hemverxatoxa Kongreya Demokratîk a Şaran (HDK) Gulîstan Kiliç Koçyîgîte, Parlamenterê HDP'yî Kemal Bulbul, Mensûr Işik, Şevîn Coşkûne û Mûsa Farisogûllariyî tewrê mîtîngî bîyî. Namzeda HDP'yî ya Hemşaredarîye Ulku Karaaslane silam da şarî û ard ziwan ke, polîtîkayê qeyûmî nêeşkenê verê şarê Gimgimî bigêrê. Karaaslane vat, “Gimgim do îradeyê xo ra wayîr bivejîyo û bi ruhê Newroze cewabo ke hewca keno bido. Namzedê Hemşaredarîye Mahmût Yalçinî zî silam da şarî û mektuba Hemşaredara Gimgimî ya Hepisxaneyê Sîncanî yê Enqere mîtîng de wende.
Hemserekê DBP’yî Mehmet Arslanî zî reaksîyon da destsernayîş û bi zor wedarnayîşê cenazeya Zehra Saglame. Arslanî serweşîye keyeyê Saglame û şarê Gimgimî rê waşte û bale ante serê tecrîdkerdişê Rayberê Şarê Kurdî Abdullah Ocalanî. Arslanî vat, “No şar cara dest îradeyê xo ra nêanceno. Nika her ca de vera tecrîdî vindeno û nê xoverdayîşî do dewam bikero.” Arslanî da zanayene ke şarê Kurdî weçînayîşê 31’ê Adare de cewabo ke hewca keno do bidero û vat, “Heme Kurdî bi taybetî Kurdê ke şehîd û adetê xo pawenê, do reyêk zî nêdê tifaqa AKP-MHP’yî.” Arslanî ra dima Parlamenterê HDP'yî yê Antalya Kemal Bulbulî û Hemvervatoxa HDK'yî Gulîstan Kiliç Koçyîgîte qisey kerd. Mîtîngî ra dima parlamenterê HDP’yî şîyî serdana serweşîya Zehra Saglame.
