Hemsereka Partya Azadî û Demokrasî ya Êzidîyan (PADÊ) Zehra Silêman ANFyî rê qisey kerd.

Silêmane vist vîrî ke serra 2021î semedê şarê Şingal û êzidîyan serrêka girane bî û vat: ''Nê plan û hêrişê 2014î ra nata dewam kenê ke komelê êzîdyan pîya bi kultur û bawerîya ci biqedîyo. La şarê êzdîyî wayîrê îrade û têkoşînî yo çirey wina rehet teslîmê îşxalkeran nêbeno. 7 serrî yo ma semedê xoîdarekerdişî îdareyo xoser nayo ro û îradeyê xopawitiş û xoîdarekerdişî vetê meydan.''

Silêmane ard ziwan ke 2021î ra nata hem hêriş hem zî xayînîye zêdîyayî û vat: ''Bitaybetî serkêşê êzdîyan ameyî hedefgirewtene. Nînan ra Seîd Hesen, Zerdeşt Şengalî, Merwan Bedel û bi desan kesî ameyî qetilkerdene. Bi nê hêrişan wazenê şarê êzidî biptersnê û ci rê payser game bidê eştene. Ser nêkewtî.  Ma çend bedelan bidê hende hêzdar benê, wayîrê xeta raşte vejîyenê. Ma xeta xo û dişmenê xo nas kenê.''

Silêmanî wina dewam kerd: ''Iraq de têna êzidî çîn ê. Qey tena vera êzidîyan hêriş yeno kerdene? Qey teyarayê tirkî yenê verê çimanê pêrune de danê domananê êzidîyan ro. Nê pêroyî eserê planêk û sîyasetêk ê. Yeno waştene ke nasname, bawerî, fîkr, kultur û tarîxê êzdiyan bêro çînkerdene. Heme dinya zana ke Seid Hesen êzdiyêkê Şingalî bi, Zerdeşt Şengalî dewa Borê ra yew êzidî bi, Mewan Bedel kesêko naskerde yê eşîrê Zeroyî bi. Têkoşîn û xoverdayîşê înan semedê newe ra paywiriştiş û teslîmnêbîyayîşê êzidîyan bi. Ma êzidîyî senî ke dost û dişmenî nas kenê, ma zanê ke ma senî xo pawenê.''

Zehra Silêman vat: ''Komelê êzidîyan hinî xo îdare keno û paweno. Par verê hêrişan şar xo nas kerd û protestoyî kerdî. Ma erjê pîlî înşa kerdî. Ma do Iraq de destûrê plan û hêrişanê teberî nêdê. Ma pawenê ke hukmato ke do Iraq de newe ra bêro ronayene zî hemkarê hêrişanê qirkerdişî yê vera êzidiyan mebo. Ma qerardarê ke heta peynî têkoşîn bikerê. Ma çend bedelan bidê zî ma do çirey peyser game meerzê. Eke ma bedel medê, ma bêçare teslîmbîyayîşî rê mecbur manenê. Teslîmbîyayîş ganî ganî merdiş o. Şingalî xo goreyê felsefe û fikrê Rayberê Şarê Kurdî Abdullah Ocalanî nayo ro.  Ma do xopawitiş û xoîdarekerdişê xo hêzdar bikerê.''

Silêmane hêrişê vera Şingal, Rojwan û Mexmûrî pabesteyê yewbînan hesibnayî û vat: ''Ma hinî zanê ke serra newî de do plan û hêrişê neweyî bêrê rayraberdene. Ma sey Îdareyê Xoserî, PADÊ, warê leşkerî de YBŞ/YJŞ û TAJÊ  ma pêro zanê ke; metod û polîtîkayê semedê çînkerdişê êzidîyan bi tewirê neweyî do bêrê domnayene. Hêrişanê peyênan de ramojna ke esmer zî do hêrişî dewam bikerê. Ê çend hêriş kenê wa bikerê ma do peyser game meerzê. Ma do xeta xo ra mevejîyê. Çend hêriş benê, bedelê dîyenê ciwananê êzidîyan zafêr tewrê hêzanê leşkerî yê YBŞ/YJŞyî benê. Roje bi roje îrade pîlêr beno.''