Konseya Hemserekîya Pêroyî ya KCKyî bi eşkerayîyêke 4ê Nîsane rojbîyayîşê Rayberê Şarê Kurdî Abdullah Ocalanî fîraz kerd.

Eşkerayîye wina ya:

''Ma rojbîyayîşê 74. yê Rayberîya xo bi rêz, heskerdiş û hesrete fîraz kenê. Rojbîyayîşê 4ê Nîsane sere de Rayber Apoyî rê, pêro cinîyan, şarê welatperwerî rê, dostan rê û hemrayanê ma rê fîraz bo.

4ê Nîsane rojbîyayîşê Rayberîye; newe ra bîyayîşê kurdan o. Seba kurdan 4ê Nîsane mujdeyê destvistişê nasnameyê xo yo. Mujdeyê merdimatîya azade, cinîya azade û cuya azade yo. 4ê Nîsane seba şarêko ke tîja xo vînî kerdo, xoresnayîşê tîja xo yo. Seba ê şaro ke mehkumê qirkerdişî bîyo, qirkerdişî ra xelisîyayîş o. Coka şarê kurdî û dostê înan her serre 4ê nîsane pê moralêkê pîlî û coşî fîraz kenê.

Şarê kurdî heta Rayberîye hetê dişmenanê xo ra mehkumê qirkerdişî amebi kerdene, raştê înkar û îmha ameyêne. Yanî şarê kurdî, welatê ci, kulturê ci tarîxî ra ameybî estaritene. Kurdî bêrayber û bêrêxistin bibîy. Rayber Apoyî peynîya na 'nêweşîya bêrêxistinîye' ya kurdan arde û coka ey qelbê kurdan qezenç kerdî. Bi nê hawayî şarê kurdî kewt rayîrê rêxistinbîyayîşî û tewirê kurdê/a azadî/e vejîya werte. No tewir eseranê tewr pîlan ra yew o ke Rayber Apoyî netîceya têkoşînêkê pîlî de veto werte.

Rojbîyayîşê Rayber Apoyî kurdan rê zemanêko newe akerd. Ey kerd ke kurdî cuyêka newîye rê haya bibê. Kurdan bi nê hawayî mîyanê şaranê dinya de cayê xo yo rûmetên girewt. Rojbîyayîşê Rayber Apoyî heman wextî de bi newe ra bîyayîşê xoza û cinîyan. Rayber Apoyî tim cinîyî azad û biîrade kerdî. Coka cinîyan ê kurdan rojbîyayîşê ey sey rojbîyayîşê xo dî û verê ey de perwerîyêka pîle mojnaye ra. Rayber Apo hema destpêk de vera sîstemê serdestîya camêrdan vejîya. Rayber Apoyî tim vat ke şerê azadîya cinîyan şerêko tewr pîl o û şero verên o. Coka cinîyan ê kurdan hende mana daye 4ê Nîsane û coka şayîyê 4ê Nîsane hende vila bîyî.

Kurdîstan de tradîsyonê 4ê Nîsane pîya ronîyayîşê leyan û rayraşîyayîşê heybetînî yê Amara yê. La resayîşê na noqta hende asan nêbi. Rixmê qedexe û tedayanê AKP-MHPyî zî rayraşîyayîşê Amara rojdemê şarî ra nêvejîyayî. Şarê ma nê rayraşîyayîşan de di ewladê xo şehîd dayî. Ma nê wird embazanê ma Mahsum Karaoglan û Mustafa Dagî bi minet û rêzî yad kenê.

Şarê kurdî û dostanê înan Newroza 2023yî de mesajê girîngî dayî. La nînan ra mesajo tewr girîng û pîl no bi ke nînan pîya azadîya Rayber Apoyî waşte. Ne şarê ma de ne zî têgêrayîşê ma de tecrîdî rê tehamul nêmendo. 2023 de armancê ma yo tewr pîl no yo ke tecrîdî wedarnê û Rayber Apoyî azad bikerê. Çunke heta ke tecrîd nêqedo şer zî nêqedîyeno, çareserîye zî nêna.

Şarê ma û dostê înan do tewirê xo yê Newroze bi qerardarî emser pîl bikerê û bi perspektîfê 'Ver bi Tîje Raywanîye' ci rê dewam bikerê. Ma zî do bi qerardarî û biîdîa seba wedaritişê tecrîdî û azadkerdişê Rayber Apoyî têkoşînê xo pîlêr bikerê. Nê esasî ser o ma venga pêro cinî û ciwanan danê ke dormeyê Rayber Apoyî de rêxistinîya xo pîl bikerê, çalakîyanê xo bitesîrêr bikerê û têkoşînî berz bikerê.''