Dewleta tirke wextê xoverdayîşê xoîdarekerdişî yê 2015-2016î de keye, bîna û awanîyê kulturelî yê qezaya Sûrî yê Amedî rijnayî. 6 taxan de adara 2016î de qedexeyê vejîyayîşê teberî ame îlankerdene, prosesê rijnayîşî dest pêkerd. Dima Sûr de TOKÎyî ameyî viraştene ke manenê zîndanan.

Hemsereka Odaya Mîmaran a Amedî Selma Aslan derheqê bînayanê ke Sûr de virazîyayê de ANFyî rê qisey kerd. 

Aslane vist vîrî ke pê karanê înşaatî taybetmendîyê Sûrî wedarîyayî û vat: ''Nê bînayî goreyê esasê asayîşî virazîyayî. Herême de rayîrê hîrayî virazîyayê ke 6 qereqol û bînayê asayîşî gênê xo zere. Semedê bahaneya asayîşî krîterê bajarwanîye ameyî binpaykerdene. Kuçe û bînayanê ci ra semed Sûr lîsteya mîrasê kultur û tarîxî de ca girewtêne. Çinkerdişê na taybetmendîye meseleyêka pîl a. Wexto ke planê mîmarîye yê cayêkî vurîyeno terzê ci yê cuye zî vurîyeno. Sûr de yeno waştene ke demografîya herême bêra vurnayene. Taybetmendîyê kulturel, komelkî yê Sûrî vurîyayê bîyê çîyêkê cîyayî. No war bîyo warê bazirganî. Ma zanenê ke do na herême seba armancanê turîstîkan bêra şuxilnayene. Coka terzê şuxilnayîşê warî zî vurîyayo.''

Aslane îfade kerd ke ê wazenê Sûrî bikerê cayêko winasên ke tede têkilîya verêne ya cîranîye û kulturî nêmendo û vat: ''Armanc xora nêbi. Armanc vurnayîşê terzê cuye yê Sûrî bi. Eşkera yo ke na taybetmendîye ameya vurnayene. Wexto ke merdimî bala xo dano ser vîneno ke Sûr hînî dinya ra zî qerifîyayo. Nê bînayî manenê zîndanan.''