Dewanê Banaderan, Tûtê û  Mele yê Licê de çarçeweya operasyonî de polîs û eskeran hêrişê dewijan kerd û hêgayê şarî yê ramiteyî vêşnayî kerdî wele. Seba nê qewimîyayîşan heyetê HDP’yî nê dewî zîyaret kerdî.

Heyeto ke tede parlementera HDP’yî ya Amedî Remzîye Tosûne û hemserekê HDP’yî yê bajarê Amedî Zeyyat Ceylan zî ca girewt, verê dewa Banadera de Mehmet Huseyîn Mercano ke hêrişê helîkopterî ra birîndar bîyo, o zîyaret kerd. Heyetî uca derheqê hêrişî de zanayîş girewt û  bado şi dewa Mele û dewijê ke hêgayê înan hetê hêzanê dewlete ra ameyî vêşnayene, ê goştarî kerdî. Dewijan vat hêgayê înan bi keyfî ameyî vêşnayene û cendirme destûr nêdano ke ê şewat hewna bikerê. Goreyê vatişê dewijan 4 hezar donimê erazî vêşayî biyî wele. Heyetê HDP’yî dewa Tûtê de hemwelatijê ke gama ke hêgayanê xo de xebityayêne ameyî destbenkerdene û bi mergî ameyî tehdîtkerdene Haci Mehmet Kapan, Mehmet Alî Kapan û Kadrî Mercan goştarî kerdî û dima ra Dozgerê Komare yê Licê dir pêvînayîşêk viraşt û qeza ra agêra.