Hêvîdara ke çimê xo qezaya Bîsmîlî ya Amedî de akerdî cinîyan ê cesuran ra yewe bî. Xeyalê dayîka Hêvîdare o bi ke domanê ci herra xo de bi ziwanê dayîke û kulturê xo pîl bikero. bi seyan rey banê ci ame sereştene. Hêvîdare hema domanîya xo de dî ke leşker û polîsî senî dayîka ci rê zulm kenê. Rîyê zext û zulê dewleta tirke ra keyeyê Hêvîdare mecbur mend ke Kurdîstanî ra bar bikero.

Keyeyê Hêvîdare hinî nêeşkayêne pîya bi dişmenî ke ê welatê ci ra vetî biciwîyê. Verî Berxwedan tewrê safanê gerîlayan bi, dima ra Hêvîdare.

Gama ke Hêvîdare resayê koyan vera dewleta îşxalkare hersê ci zafêr bi. Berxwedan hinî bibi bêmerg. Hêvîdare hinî teqîpkarê Berxwedanî bî. Aye do birayê xo her warê têkoşînî de bidayêne ciwîyayene. Birayê ci yo kişkek zî înan ra dima tewrê gerîlayan bi û çeka Berxedanî girewte. Hinî warê şerî de eynî keyeyî ra hîrê kesî bî. Bîyî hemrayê yewbînan. Biyî şervanê azadîye ke bi hewayêkê qehremankî têkoşîn kenê. Bîyî domanê tije.

Dayîka nê hîrê qehremana bado ke domanê ci tewrê têgêrayîşê azadîye bîyî aye zî vera polîtîkayanê şerê taybetî yê dewleta tirke zîndan de şer kerd. Dayîke mektûba xo de wina qala rewşe kerdêne: ''Serrêke û nêm a ez zîndan de ya û cezaya des serran dîyaye mi. Tewr peynî de ez Zîdanê Êlihî ra surgunê Anqara bîya. Hîrê hewteyo ke ma tîya têkoşîn kenê. Ma do heta dalpaya peyêne ya gonîya xo dewa û têkoşînê şehîdan bidê domnayene.''  Dayîka ci kênaya xo Hêvîdare  rê wina vatêne: ''Tira waştişê mi oyo ke, şi gorê şehîd Berxwedanî ser û hîrê rey veng bikerê ci û selamanê mi ci rê vajê.''

Hêvîdare kênaya dayîka xo, waya Berxedananê qehremanan bÎ. Tim bi na persbîyarîye têgêraye. Hêzê xo têkoşînî ra girewtêne û dormeyê xo hêvîye vila kerdêne. Her roje dahîna hêzdar bîyêne û waştêne şiro waranê zoran ê têkoşînî. Serranê têkoşînî de Xinêre, Xakurkê, Zap, Heftanîn û tewr peynî de zî Şemzînan de rêçê xo verdayî. Her game de xeyalê azadkerdişê Kurdîstanî rê nêzdî bîye. Azadîye verî mezgê ci de ameye. Hêvîdare bîyî rêça heqîqetî.

Hêvîya ke Hêvîdare û birayanê ci yê qehremanan zerrîye û mezgê xo kiriştêne do çirey merê  vîrakerdene. Name û beyraqê înan  do çirey merê war, ê do tim tîtikê koyan de biciwîyê.

Hêvîdare Amed ( Zarîfe Suylu) 2ê teşrîna verêne ya 2012yî de Şemzînan de pîya bi 4 embazanê xo şehîde bîye. Birayê ci Berxwedan Kaya (Ali Soylu) 8ê sibata 2004î de Qendîl de û Berxwedan Amed (Saît Soylu) 11 gulana 2009î de şehîd bîyî.