Merkezê Îrtîbatî û Çapemenîye yê HPGyî nasnameyê şehîdêkî eşkera kerd. Eşkerayîye wina ya:

''Qetî bi ke embaz Rûbar Hêbûn 7ê kanûne de dewa Hacilarî ya qezaya Hewagî ya Riha de şehîd bîyo.''

Nasnameyê embaz Rûbarî wina yo:

Nameyê Qodî: Rûbar Hebûn Name û Peyname: Ferhat Tunç Cayê Bîyayîşî: Riha Maye-Pî: Remzîye – Kemal Tarîx û Cayê Şehadetî: 7ê Kanûna 2021î / Riha

Şaristanê qedîmî yê Kurdîstanî Riha xeylêk medenîyetan rê meymandarîye kerde û rayberîya xeylêk xoverdayîşan zî kerde. Coka Riha tim bîye hedefê dewleta tirke ya qirkere. La Riha qetî vera hêrişan, ajanan û kanperestan sereyê xo nêard war. Şarê Riha rixmê hemkar û kontrayan tim rêçê çêran û xoverdayoxan de şi.

Embaz Rûbar hema ke ciwan bi tewrê têkoşînê vera polîtîkayanê dewlete bi. Ey fam kerd ke tek rayîrê têkoşînê vera dewlete xoverdayîşê gerîlayan ra derbaz beno. Embaz Rûbarî bêteredut wezîfe girewt xo milî û verê xo da koyanê azadan. Ey tim tewirêko fedakar, rayber mojna û pê nê tewirê xo o bi mazharê hûrmetê embazanê xo. Ey Xakûrkê ra heta Zagrosan, uca ra heta Herêmanê Pawitişî yê Medya xeylêk waran de wezîfe kerd, pêro mesuldarî û erkê xo bi serkewtişî ardî ca.

Embaz Rûbarî xeylêk çalakîyan de derbê giranî dayî dişmenî ro. Ey wextê hêrişanê DAÎŞî de 2014 de şaristananê Mexmûr û Kerkûkî yê Başûrê Kurdîstanî de bi çêrî şer kerd û rixmo ke birîndar bi cepheyê şerî war nêverda. O heta serkewtişê vera DAÎŞî Mexmûr û Kerkûk de mend û dima zî ancî derbazê Herêmanê Pawitişî yê Medya bi. Ey tim israr kerd ke Vakurê Kurdîstanî de pratîze bibo. Naye ser o o derbazê Riha bi û uca de xo dişmenî ra xeylêk wext pawit. Ey bi sereyê xo uca de kar kerd, netîceyê girîng û ercîyayeî afernayî. Embaz Rûbar wexto ke wezîfeyê xo ser de bi 7ê kanûna 2021î de şehîd bi.

Cuya têkoşînê 12 serrî ya destanwarî ya embaz Rûbarî do embazanê ci rê biba çimeyê îlhamî, bivurîya meşaleya ke rayîrê ma roşnî bikera û mîyanê têkoşînê azadîye de tim biciwîya. Nê esasî ser o ma sere de keyeyê ci yê ercîyayeyî rê, şarê welatperwerî yê Riha û pêro Kurdîstanî rê serweşîye wazenê.''