Merkezê Îrtîbatî û Çapemenîye yê HPGyî bi eşkerayîyêke 5 gerîlayê ke 13ê çeleyê 2016î de Xakûrkê de şehîd bîyî bi rêzdarî yad kerdî. Eşkerayîye wina ya:

''13ê çeleyê 2016î de warê Şehîde Bêrîtane yê Xakûrkê de hêrişê artêşa tirke ya îşxalkere de embazanê ma Avaşîne, Sîpani Mahîr, Rêzan û Cesurî îradeyo pîl mojna, derbê giranî dayî dişmenî ro û şehîd bîyî. Ma serrgêra şehadetî de nê embazanê xo yê çêran bi rêzdarî û minetî yad kenê.

Nasnameyê embazanê ma yê şehîdan wina yê:

Embaze Avaşîne Şirnex de dadîya xo ra bîya. Embaze Avaşîne şehadetê xala xo ra dima verê xo da koyanê azadan ê Kurdîstanî û 2011 de tewra gerîlayan bîye. Embaze Avaşîne roja verêne ra nata bibî wayîra tewirêkê qerardarî û bimgeyê îdeolojîya azadîya cinîyan a Rayberîye de tim xîret kerd ke xo aver bera. Embaze Avaşînî pê perwerdeyan tim xîret kerd ke biba fermandar. Aye sey gerîlayêka cinîye pê tewirê xo yê durustî hetkarîya averşîyayîşê embazanê xo kerde û zerrîya embazanê xo de ca girewt.

Embaz Sîpan Wan de dadîya xo ra bîyo. Embaz Sîpanî cigêrayîşan ra dima pê hesîya ke tek rayîrê serkewtişî têkoşînê gerîlayan o û bi nê hawayî tewrê gerîlayan bi. Embaz Sîpanî nêverda ke zehmetîyî rayîrê ci  bigêrê û tim xo aver berd. Embaz Sîpan wextêkê kilmî de bi gerîlayêko marîfetîn. Embaz Sîpanî çi musayo pratîk de ard ca. Ey pê coşêkê pîlî kerd ke bibo milîtanêko mîsal.

Embaz Mahîro ke eslê xo de Bedlîsî ra yo, Îstanbul de dadîya xo ra bîyo. Embaz Mahîrî metropolan de raştîya dişmenî dîye û serra 2014î de bire daye ke tewrê gerîlayan bibı. Embaz Mahîr bi nê hawayî resa cuyêka manadare. Embaz Mahîrî pê girîngîya azadîya Rayber Apoyî û şarê kurdî wezîfeyê xo ardî ca û her xebate de xo rê serkewtiş esas kerd. Embaz Mahîr pê cesaret û çêrîya xo bi milîtanêko rayber.

Embaz Rêzan Şirnex de dadîya xo ra bîyo. Embaz Rêzanî cuya kolonyalîste qebul nêkerde û sey ciwanêkê kurdî tewrê gerîlayan bi. Embaz Rêzan cuya gerîlatîye de tewr zaf binê tesîrê embazîya partîye de mend û bi mazharê heskerdiş û hûrmetê embazanê xo. Embaz Rêzanî tim xo rê averşîyayîş û serkewtiş esas kerd, bi nê armancî têgêra û xîret kerd ke têkoşînê gerîlayan berz bikero.

Embaz Cesur Colemêrg de dadîya xo ra bîyo. Embaz Cesurî 2015 de polîtîkayê asîmîlasyonî yê dewlete red kerdî û tewrê gerîlayan bi. Embaz Cesurî kesayetê xo de vurîyayîşê pîlî kerdî û verî xo rê azadîya Rayber Apoyî armanc kerde. Embaz Cesur perwerdeyan ra dima bi milîtanêko serkewte û çi musayo pratîk de bi serkewtişî ard ca. Ey pêro wezîfeyê xo ardî ca û bi kesayetê xo bi mazharê heskerdişê embazanê xo.

Şehadetê embazanê ma do bibo sebebê xoverdayîş û têkoşînê pîlêrî. Ma sere de keyeyanê ercîyayeyan ê embazanê xo rê pêro şarê welatperwerî yê Kurdîstanî rê serweşîye wazenê. ''