Merkezê Îrtîbatî û Çapemenîye yê HPGyî nasnameyê 6 gerîlayanê ke Dêrsim de 7ê hezîrana 2020î de şehîd bîyî eşkera kerdî. Eşkerayîye wina ya:

''Ma eşkerayîya xo ya 17ê hezîrana 2020î de dabi zanayene ke artêşa tirke ya îşxalkere 30ê gulana 2020î de Gelîya Axvanosî ya qezaya Pulirî ya Dêrsimî de operasyonêkê îşxalî dayo zanayene û nê operasyonî heta 7ê hezîrane dewam kerdo. Ma pare kerdbi ke prosesê nê operasyonî de mabênê hêzanê ma û hêzanê îşxalkeran de pêkewtişê giranî qewimîyayê, nê pêkewtişan de xeylêk îşxalkerî ameyê cezakerdene û embazê ma Denîz, Agir, Jîyanda, Gulan, Munzur û Rênas ê ke bi fedayîtî şer kerd, şehîd bîyî.

Nasnameyê embazanê ma yê şehîdan wina yê:

Embaz Denîz Dêrsim de dadîya xo ra bîyo. O wexto ke Fakulteyê Tipî yê Antalya de wendekar bi, tewrê xebatanê ciwanan bi û rixmo ke çend reyî ame destbendkerdene tewirê xo ra qetî tawîz nêda. Embaz Denîz 2004 de tewrê gerîlayan bi û sey doktorî xeylêk waran de têkoşîn kerd. Embaz Denîz 2012 de waştişê xo ser o derbazê Vakurê Kurdîstanî bi û sey fermandarêkî û doktorêkî Dêrsim de dest pê wezîfe kerd. Embaz Denîzî xeylêk çalakîyanê serkewteyan de ca girewt û serfîrazîyê pîlî ardî ca. Vîrameyîşê embaz Denîzî do tim mîyanê têkoşînê ma de biciwîyo.

Embaz Agir şaristanê Merîwanî yê Rojhelatê Kurdîstanî de dadîya xo ra bîyo û prosesê Komployê 15ê Sibate de 2007 de tewrê gerîlayan bi.  Embaz Agirî verî Qendîl de gerîlatîye pratîze kerde û 2011 de şer de tewr vernî de ca girewt. Dima o waştişê xo ser o derbazê Vakurî bi û uca ra zî derbazê Dengizê Reşî bi. Embaz Agirî tîya de çalakîyê serkewteyî ardî ca, dima reyna agêra Dêrsim. Embaz Agirî pê kesayetê xo yê fedakar, kedkarî pêro wezîfeyî bêkêmasî ardî ca.

Embaze Jîyanda eslê xo eşîra Gewda ra ya la tedaya dewlete ra dima keyeyê ci nêçare mendo ke koçê metropolanê Tirkîya bikero. Embaze Jîyandaya ke merdima fermandara bêmerge Rojîne Gewda ya, 2014 de tewra gerîlayan bîye. Embaz Jîyanda wextê hêrişanê DAÎŞî de Şingal de têkoşîn kerd. Dima ke Şingal ame azadkerdene a derbazê Vakurê Kurdîstanî bîye û koyanê Dêrsimî de vera dişmenî têkoşînêko bêeman kerd. Embaze Jîyanda xeylêk çalakîyan de tewr vernî de şer kerd û heta şehadetê xo kedêka pîle mojnaye. Keda ci do rayîrê ma roşnî bikera.

Embaze Gulane Amed de dadîya xo ra bîya. Embaze Gulane wextê zanîngehî de têgêrayîşê ma şinasna û pê hersê vera zulmê dewlete 2016 de bêteredut tewra gerîlayan bîye. Embaze Gulane wextêkê kilmî de cuya gerîlatîye musaye û pratîkêko pîl pêşkêş kerd. Embaze Gulane warê Amedî ra dima derbazê Dêrsimî bîye û vera îşxalkeran xo ver da. Aye xeylêk çalakîyanê serkewteyan de ca girewt û alaya îdeolojîya azadîya cinîyan a PKKyî heta şehadetê xo kirişte. Embaze Gulane Dêrsim de bîye milîtana xeta PKK û PAJKî.

Embaz Munzur û Rênasî Dêrsim de xoverdayîşê destabwarîyî de ca girewt û vera dewleta tirke bîyî wayîrê têkoşînê bêemanî. Embaz Munzur û Rênas Amed de dadîya xo ra bîyê. Wird embazanê ma zî seba azadîya şarê xo şerê PKKyî weçîna. Wird embazê ma zî tarîxê azadîye yê şarê xo de do sey mîsalanê fedakarîye biciwîyê û bêrê vîrardene.

Embazanê ma Denîz, Agir, Jîyanda, Gulane, Munzur û Rênasî têkoşînê azadîya Kurdîstanî de fedakarîye ra qetî fek vera nêda û vera dişmenê faşîstî şer kerd, şehîd bîyî. Ma sere de keyeyanê ercîyayeyan ê embazanê xo rê pêro şarê welatperwerî yê Kurdîstanî rê serweşîye wazenê. Ma do sozê serkewtişî yo ke dabi embazanê xo bîyarê ca.''