Merkezê Îrtîbatî û Çapemenîye yê HPGyî bi eşkerayîyêke da zanayene ke Leyla Turgut (Koçerîne Rojîn), Dilsoze Habîb (Axîn Amûdê) û Songule Tarinci (Roza Rênas Amed) 12ê êlula 2022yî de û Bêrîvane Mustafa (Avrîne Mahsum) zî 19ê êlule de Herêmanê Pawitişî yê Medya de şehîd bîyê.

Eşkerayîye wina ya: 

''Herêmanê Pawitişî yê Medya de hêrişanê dişmenî de, 12 û 19ê êlula 2022yî de milîtanê fedayî yê çapemenîya azade, kadroyê serkêşî yê Merkezê Çapemenîye yê HPG û YJA-Starî embazê ma Koçerîne, Avrîne, Axîne û Roza şehîd bîyî.

Embazê ma Koçerîne, Avrîne, Axîne û Roza Mazlûm Doganan ra heta Gurbetellî Ersozan, Xelîl Dagan ra heta Arjîne Amed, Hindîstan Pênaber, Ali Kanîroj, Amara Ronahî, Jiyan Amargî û Şaristane Asmîn bîyî temsîlkarê çapemenîya azade ya ewroyîne. Nê embazanê ma seba ke raştîyanê ke koyan de qewimîyenê biresnê şarê ma rixmê pêro zehmetîyan zî pêro erkê xo ardî ca. Embazê ma Koçerîne, Avrîne, Axîne û Roza nê oxirî de bîyî vengê gerîlayanê azadîye yê Kurdîstanî û bi qehremanî şehîd bîyî.

Ma sere de keyeyanê înan ê ercîyayeyan rê pêro şarê Kurdîstanî yê welatperwerî rê serweşîye wazenê.

Nasnameyê embazanê ma wina yê:

Embaze Koçerîne qezaya Dîgorî ya Qersî de dadîya xo ra bena. A destpêk de xebatanê ciwanan de cagêna û dima 2013 de verê xo dana koyanê azadan. A Avaşîn de perwerdeyê verênî gêna û bena milîtanêka serkêşe ya YJA-Starî. Embaze Koçerîne Kerkûk û Mexmûrî de vera DAÎŞî şer kena û dima agêrena koyan. A dima xebatanê Merkezê Îrtîbatî û Çapemenîye yê HPGyî de cagêna. Embaze Koçerîne ge çeke gêna xo destî ge zî kamera û xoverdayîşê embazanê xo qeyd kena. Ma do têkoşînê aye bi serkewtişî tacîdar bikerê. 

Embaze Avrîne Efrîn de dadîya xo ra bena. Embaze Avrîna ke di way û birayê ci tewrê têkoşînê azadîye bîyê PKKyî nêzdî ra şinasnena û tewrê Şorişê Rojawanî bena. A vera DAÎŞî şer kena û bena muxabîre. Embaze Avrîne xoverdayîşê Efrînî yê 2018î de zî sey şerwane û muxabîre cagêna. Naye ra dima a verê xo dana koyan. 2020 de embaze Avrîne tewra xebatanê Merkezê Îrtîbatî û Çapemenîye yê YJA-Starî bena. Embaze Avrîne bi layîqî tradîsyonê çapemenîya azade ana ca. A Herêmanê Pawitişî yê Medya de şerê giranî nêzdî ra teqîb kena û resnena şarî ma. A peynîya xo de cuyêka milîtanîya marîfetîne verdena.

Embaze Axîne Amûdê de dadîya xo ra bena. A sey mamostayêka kurdkî tewra Şorişê Rojawanî bena û 2017 de zî vera xo dana koyanê azadan, bena gerîla.Embaze Axîne akademîya Apolloyî de perwerde vînena û Zap de pratîkê verênî kena. Embaze Axîne dima tewra xebatanê Merkezê Îrtîbatî û Çapemenîye yê YJA-Starî bena. A rixmê şertanê zehmetan zî bername û xeberanê xo bi serkewtişî kena û bena milîtanêka serkêşe ya YJA-Starî. Embaze Axîne wextêkê kilmî de xeta fedayîyan de şina û peyê xo de mîrasêkê xurtî yê çapemenîya azade verdena.

Embaze Roza Amed de dadîya xo ra bena. A hêverî tewra xebatanê ciwanan bena. Şorişê Rojawanî ra dima 2015 de a tewra têkoşînî bena, vera DAÎŞî bi qehremanî ler kena. 2018 de zî embaze Roza verê xo dana koyanê azadan. A Qendîl de perwerde vînena, dima derbazê Garê bena. Embaze Roza wextêkê kilmî de xo aver bena û bi pratîkê xo bena milîtanêka serkêşe. A Akademîya Apolloyî de perwerde vînena û bena kedkarêka çapemenîya azade. Embaze Roza wextanê zoran de zî erk û mesuldarîyanê xo bêkêmasî ana ca û embazanê xo rê bena nimûne. Têkoşînê aye tim do verê ma roşnî bikero.''