Merkezê Îrtîbatî û Çapemenîye yê HPGyî da zanayene ke Dêrsim de hîrê gerîlayî şehîd bîyî û nê vatî:

''Dêrsim de hêrişê artêşa tirke yê vera hêzanê ma bêmabên dewam kenê. 23-24ê kanûna 2022yî de mabênê hêzanê ma û îşxalkeran de pêkewtişî qewimîyayî. Pêkewtişan de ke bi saetan dewam kerd, hemrayê ma Endamê Fermandarîya Eyaletê Dêrismî Şevger Semsûr û Arjîne Sarya şehîd bîyî. Hemrayê ma Fermandarê Eyaletê Dêrsimî Yaşar Botanê ke nê pêkewişî de derbeyê giranî dayî dişmenî ro û mîyanê dişmenî ra weş xelisîya, 1ê adara 2023yî de reyna dişmenî reyde kewt mîyanê pêkewtişî û seba ke weş destê dişmenî mekewo bi hewayêkê fedayîyî tewrê kerwanê şehîdan bi.

Hemrayê ma Fermandarê Eyaletê Dêrsimî Yaşar Botan, Endamê Fermandarîya Eyaletê Dêrsimî Şevger Semsûr û Arjîne Sarya bi cesaretê xurtî, heta hela peyêne vera dişmenî şer kerd û bi hewayêkê qehremankîyî tewrê kerwanê şehîdan bîyî.

Têkoşînê azadîye yê Dêrsimî yo ke Seyîd Rizayan ra heta Besêyan, Sarayan ra heta Bêrîtanan, Çetîn Sîvêrekan ra heta Atakan Mahîran, Zîneyan ra heta Çîçekan, Yilmazan ra heta Yaşaran xeylêk qehremanan rê bi mekanê xoverdayîşî, do tim dewam bikero. Hesretê bimbarekî yê şehîdanê ma yê ezîzan do miheqeq bêrê caardene.  Na çareçewe de ma sere de keyeyanê erjîyayeyan ê hemrayanê ma yê şehîdan, heme şarê welatperwerî yê Kurdsîtanî rê serweşîye wazenê.

Nasnameyê Embazanê ma yê şehîdan wina yê:

Nameyê Qodî: Yaşar Botan Name û Peyname: Osman Manak Cayê Bîyayîşî: Şirnex Maye-Pî: Cahide – Mahmut Tarîx û Cayê Şehadetî: 1ê Adara 2023yî / Dêrsim

 

Nameyê Qodî: Şevger Semsûr Name û Peyname: Zeynal Kuçuk Cayê Bîyayîşî: Semsûr Maye-Pî: Hayriye – Mehmet Tarîx û Cayê Şehadetî: 24ê Kanûna 2022yî / Dêrsim

 

Nameyê Qodî: Arjîne Sarya Name û Peyname: Şehrîbane Tekmenuray Cayê Bîyayîşî: Antalya Maye-Pî: Fatma – Ramazan Tarîx û Cayê Şehadetî: 24ê Kanûna 2022yî / Dêrsim

Hemrayê ma Yaşar Botan Sîlopîyaya Şirnexî de yeno dinya û sey edamêkê eşîrê Zêvkî beno pîl. 1994 de dewa ci yena vêşnayene û keyeyê ci bar keno şino Başûrê Kurdîstanî. Şaro ke zextê dewleta tirke ver Vakurê Kurdîstanî ra şino Başûrê Kurdîstanî tîya zî raştê hêrişê PDKyî yeno. Nê hêrişî heta 1998î dewam kenê. Şarê ma ke zaf rey cayê kampan bedilnayî tewr peynî de Mexmûr de ca dano xo. Hemrayê ma Yaşar Mexmûr de ziwanê xo yê dayîke de perwerde vîneno û wayîrê ercanê xo vejîyeno. Apê hemrayê ma Yaşarî Zîndan Cizre (Abdullah Manak) 1994 de zagrosan de şehîd beno.

Hemrayê ma Yaşar 27ê sibata 1999î de tewrê sefanê gerîlayan beno. Badê perwerdeyanê verênen ê leşkerîyan 2000 de tewrê rêxitina fedayîyan beno. 2003 de pawitoxîya îdarekaranê têgêrayîşê ma keno. Çarçeweya Hemleya 1ê Hezîrene de 2004 de  agêreno Vakurê Kurdîstanî û ravîyarano Dêrsim. Tîya panc serî têkoşîno biheybet rayra beno. 2009 de  ravîyareno Herêmanê Pawitişî yê Medya û 2010-2011 Akademîya Hakî Karerî de perwerdeyê leşkerî û îdeolojîkî vîneno. 2013 de berpirsîyarîya koordînasyonê perwerdeyê şervananê newayan geno xo ser. 2016 de Ocaxê Partîya ma PKKyî de perwerde vîneno û dima ra pîya bi fermandaranê ma qehremanan ra Yilmaz Dersimî verê xo dano Dêrsimî. Hemrayê Yaşar sey Fermandarê Eyaletê Dêrsimî xebatanê serkewteyan rayra beno û bi têkoşînê xo yê 24 serran beno qerhremanêkê şarî.

 Hemrayê Şevger eslê xo de dewa Hesenkoyî ya Semsûrî ra yo la rîyê tay sebeban ra dewa Trintilî yê Semsûrî de  yeno dinya  keyeyêkê elewî de beno pîl. Rîyê polîtîaya asîmîlasyonî ra keyeyê ey bar keno şino yewna dewe. Hemrayê ma Şevger gama ke Unîversîteya Uludagî de waneno polîtîkaya asîmîlasyonî ya vera kurdan dahîna nêzdî ra vîneno û unîversîte caverdeno. Dima reyna Unîversîteya Firatî de dest pê wendişî keno û xebatanê ciwanan de aktîf ca geno. Hemrayê ma Şevger 2004 de tewrê sefanê gerîlayan beno. Perwerdeyê verênî Xinerê de vîneno û Xakurkê, Xinerê û Zagrosan de pratîk raya beno. 2010 de ravîyareno herêma Dêrsimî sey fermandarêkê serkêşî wezîfe geno xoser. Hemrayê ma Şevger têkoşînê xo 18 serran de 

Hemraya ma Arjîne Sarya sey ferdêka keyeyê welatperwerî yê Şirnexî Antalya de de yena dinya. Seba ke keyeyê ci zextê dewlete ver bar kerdo şîyo metropolanê tirkan bi hesretê Kurdîstanî bena pîle û la çirey eslê xo ra dûrî nêkewna. Embaza ma  Arjîne 2024 de agêrana Kurdîstanî û Amedî ra tewrê sefanê gerîlayan bena. Tîya ra ravîyarena herêma Dêrsimî û perwerdeyê gerîlatîye yê verênî tîya gena. Xeylêk waranê Dêrsimî de gerîlatîye kena û sey mîlîtanêka serkêşe ya YJA Starî zaf çalakîyanê serkewteyan de ca gena.''