HPGyî bîlançoya şerî ya menga adare eşkera kerde. Goreyê ney îşxalkeran 72 reyî pê teyarayanê şerî, 1357 reyî pê helîkopter, obusi hawan, tank û çekanê giranan, 53 reyî pê çeka fosforî, bombayanê qedexekerdeyan û çekanê kîmyewîyan hêriş kerd.
Merkezê Îrtîbatî û Çapemenîye yê HPGyî bîlançoya şerî ya menga adare eşkera kerd. Bîlanço wina ya:
''Rejîmê AKP-MHPyî yo ke dişmenê şarê kurdî, cinî, ciwanan û şaran o, seba ke payan ser de vindero şer de israr keno. Seba rejîmê AKP-MHPyî hêrişkerdişê kurdan û îmhakerdişê kurdan bîyo polîtîkayêka mende. Nê prosesî de ke şarê Tirkîya mîyanê krîzêkê pîlî de yê û vêşanî û dejan ra nalenê, AKP-MHP bi xorinkerdişê faşîzmî keno ke îqtîdar de bimano. Seba nê armancî zî hêrişanê xo yê vera kurdan zêdîneno.
Rixmo ke hêzê ma yê pawitişî pozîsyonê çalakînêkerdişî de yê rejîmê AKP-MHPyî de Vakurê Kurdîstanî de operasyon û hêrişanê xo yê leşkerîyan ra bêmabên dewam keno. Sere de Dêrsim, Besta, Mêrdîn, Cûdî û Colemêrg de, xeylêk cayan de rejîmî operasyonî kerdî, hêrişê hêzanê ma kerd û tay cayan de zî tay embazê ma şehîd bîyî. Vera Herêmanê Pawitişî yê Medya zî artêşa tirke ya îşxalkere pê hêzanê hewa û erdî, her roje hêrişanê xo rê dewam kerd. Na menga adare de goreyê tesbîtanê ma Herêmê Pawitişî yê Medya 72 reyî pê teyarayanê şerî, 1357 reyî pê helîkopter, obusi hawan, tank û çekanê giranan dîyayê bombayan ver. Mewzîyê xoverdayîşî yê gerîlayan zî 53 reyî pê çeka fosforî, bombayanê qedexekerdeyan û çekanê kîmyewîyan dîyayê bombayan ver.
Hêzê ma bêmabên raştê hêrişanê artêşa tirke ameyî, înan seba xopawitişî cewab da nê hêrişan û netîceya nînan de zî 32 çalakîyê gerîlayan ameyî kerdene, 6 îşxalkerî ameyî cezakerdene. Hetê bînî ra 1 sîstemê kameraya mobese û 1 dron zî ame îmhakerdene.''
