Merkezê Îrtîbatî û Çapemenîye yê HPGyî 5 gerîlayê ke 2017 de Heftanîn de şehîd bîyê yad kerdî. Eşkerayîya HPGyî wina ya:

''Menga çeleyî yê 2017î de warê Heftanîn de hêrişanê dewleta tirke ya îşxalkere de embazê ma Serhed, Numan, Mîrhat, Agît û Bager şehîd bîyî. Ma embazanê xo serrgêra şehadetê înan de bi rêzdarî yad kenê. Ma soz danê ke mîrasê înan ê xoverdayîşî pê serkewtişî tacîdar bikerê.

Nasnameyê embazanê ma yê şehîdan wina yê:

Embaz Serhed Wan de dadîya xo ra bîyo. Embaz Serhedî seba ke deynê xo bido şarê xo 2013 de bire daye ke verê xo bido koyanê azadan û bi nê hawayî o tewrê gerîlayan bi. O pê qelbê xo yê pakî û kesayetê xo yê samîmî bi mazharê heskerdişê embazanê xo. Ey mîyanê PKKyî pê perwerdeyan xo aver berd û agêra ziwan, kultur û tarîxê xo. Embaz Serhed pê tewir û kesayetê xo seba embazanê xo tim bi milîtanêko mîsal.

Embaz Numan qezaya Licê ya Amedî de dadîya xo ra bîyo. Embaz Numan wextê hêrişanê DAÎŞî yê vera Kobanê de tewrê gerîlayan bi. Embaz Numanî wextê kilmî de warê îdeolojîk û leşkerî de xo aver berd. Dima derbazê Başûrê Kurdîstanî bi û nêzdî ra partîya ma şinasnaye. Embaz Numanî pê fedakarîya xo tim tewr vernî de ca girewt, waranê Metîna û Heftanînî de gerîlatîye kerde. Embaz Numano ke vera hêrişan tim serkewtiş xo rê esas kerd xeylêk çalakîyanê serkewteyan de ca girewt û bi kerrayanê rayîrê serkewtişî ra yew.

Embaz Mîrhat Wan de dadîya xo ra bîyo. Embaz Mîrhatî pê hêrsê vera dişmenî 2015 de verê xo da koyanê azadan ê Kurdîstanî. Embazîya PKKyî zaf tesîrê ey kerd. O hema şinasnayîşê verênî de bi eşiqê koyanê Kurdîstanî. Embaz Mîrhatî tim xîret kerd ke gerîlatîye bimuso û fam bikero. Ey ceh kerd ke bibo milîtanêko marîfetîn. Embaz Mîrkan embazîya xo de tim samîmî, sade û eşkera bi. Ey pê milîtanîya xo mîyanê çêranê bêmergan ê Heftanînî de cayê xo girewt.

Embaz Agît Mêrdîn de dadîya xo ra bîyo. Embaz Agîtî wextê zanîngehî de tewrê xebetan bi. Embaz Agîtî vera dişmeno ke hêrişê cenazayanê gerîlayan kerdêne bire daye ke tewrê gerîlayan bibo. Embaz Agîtî seba ke qesasê şehîdan bigêro tim bi hawayêkê aktîfî têkoşîn kerd. O tewr zaf binê tesîrê embazîya gerîlayan de mend û pê embazîya xo rengê xo da koyanê Kurdîstanî ser.

Embaz Bager Şirnex de dadîya xo ra bîyo. Embaz Bager verî tewrê karanê ciwanîye bi û wextê Xoverdayîşê Xoîdarekerdişî de bire daye ke tewrê gerîlayan bibo. Embaz Bagerî verî waranê Amed û Erziromî de gerîlatîye kerde dima zî derbazê waranê Heftanîn û Metîna yê Başûrê Kurdîstanî bi. Embaz Bagerî bi taybetî warê Heftanînî de xeylêk çalakîyanê serkewteyan de ca girewt. O pê kesayetê xo yê fedakar û kedkarî bi mazharê heskerdişê embazanê xo. Embaz Bagerî tim xîret kerd ke bibo layîqê embazanê xo û Rayber Apoyî.

Ma sere de keyeyanê ercîyayeyan ê embazanê xo rê pêro şarê welatperwerî yê Kurdîstanî rê serweşîye wazenê.''