Kakeyî: PDK nêverdeno Iraq hêrişanê Tirkîya bivisno rojdemê dinya

Hejar Kakeyîyî bale ante hemkarîya PDKyî û dewleta tirke ser û vat: ''PDK rayîr nêdano ke Iraq vera hêrişanê Tirkîya warê mîyanneteweyî de têbigêro.''

Pisporê huqûqê mîyanneteweyî û avûkat Hejar Nûredîn Kakeyîyî derheqê hêrişanê kîmyewîyan ê dewleta tirke, hemkarîya PDKyî, bêvengîya Ewropa û dezgehanê mîyanneteweyîyan de ANFyî rê qisey kerd. 

Kakeyîyî vist vîrî ke wexto ke dewleta tirke hêrişê seyrangehê Zaxoyî kerdbi Iraqî bi giranî nêrazîbîyayîşê xo mojna la PDKyî nêverda ke Iraq hêriş bero rojdemê Meclîsê Asayîşê Mîyanneteweyî.  Kakayîyî vat: ''PDK binê serwerîya Erdoganî û Başûrê Kurdîstanî de sîyasetî keno. PDK rayîr nêdano ke hukmatê Iraqî dosyaya Tirkîya bido Neteweyanê Yewbîyayeyan. Şuxilnayîşê çekanê kîmyewîyan hetê bi desan peymanan ra ameyo qedexekerdene û Tirkîya zî nê peymanî îmza kerdê. La rixmê ney zî dewleta tirke herêma ma de çekanê kîmyewîyan şuxilnena û nê peymanan binpay kena. Hêzê mîyanneteweyî zî nê hêrişanê kîmyewîyan rê çimê xo gênê.

Tay heyetanê mîyanneteweyîyan ê xoseran waştbi ke herême de hêrişanê kîmyewîyan ser o cigêrayîşan bikerê la PDKyî verê înan girewt. Oyo ke PDK keno dişmenî ya. PDK bi nê hawayî beno hemkarê sûcanê dewleta tirke.''

Kakeyîyî rexne kerd ke OPCW zî verê hêrişanê kîmyewîyan ê dewleta tirke ya îşxalkere nêgêno. Kakayîyî venga partî û dezgehanê kurdan da û vat: ''Ganî partî û dezgehê kurdan sîyasetê şexsîyî ra fek vera bidê û nê tehlukeyan bivînê. Ganî yew xeta kurdayetîye ser de ma hêrişanê vera Kurdîstanî vindarnê.''

https://anfkirmancki.com/kurdistan/kakeyi-heze-kurdan-gani-vera-herisan-bibe-yew-32082