Endamê Komîteya Rayberdişî ya PKKyî Duran Kalkanî ajansê ma rê qala Komployê Mîyanneteweyî, sîstemê tecrîd û îşkenceyî yê Îmraliyî û têkoşîno ke vera nê yeno dayene kerd. Beşê dîyinî yê roportajî wina yo:

Rayberê Şarê Kurdî Komployo Mîyanneteweyî bi nêzdîbîyayîşê îdeolojîk, felsefe û paradîgma yê sey 'bîyayîşê hîrêyînî' pênase kerd, cewab da. Şarê kurdî û PKKyî vera komployî xo ver da. Na rewşe senî tesîrê hêzanê komplokaran û polîtîkaya kurdan û Kurdîstanî kerd?

Dima ke 11ê çeleyê 2000î de bira dardekerdişî ya hukmatê Ecevîtî nêameye caardene xoverdayîşê Îmraliyî dest pêkerd. Îdareyê Tirkîya xîret kerd ke pê sîstemê Îmraliyî PKK tasfîye bikero û kurdan qir bikero. Şarê kurdî paştî daye Rayberîye û têkoşînê Îmraliyî dest pêkerd. Rayberîye Îmrali de kewte mîyanê persan, peyê cigêrayîş, ercnayîş û cewaban. Rayber Apoyî heman çi pêro embazan rê pêşnîyaz kerd û derheqê înzîwaya xo de agahîyî dayî ma. Rayber Apoyî vatêne o ho mîyanê prosesê rexnedayîşî de yo û ma ra zî heman çi waşt.

Rayber Apoyî nê esasî ser o 2001 de vat hînî ganî PKK hetê îdeolojî ra bivurîyo, na rewşe layîqa PKKyî nîya. 2002 de ma Kongreya 8. kerde. Çareserîye vurnayîşê paradîgma bîye, no kokî ra vurîyayîş bi. Na çarçewe de Rayber Apoyî cigêrayîşêko xorin kerd. Nê esasî ser o rayîrê demokrasî vejîya werte. Ma vat 'Paradîgmaya Komelê Demokratîkî' ke azadîya cinîyan û komelêkê ekolojîkî wazena. Sîyasetê rêxistinkerdişê konfederalîzmê demokratîkî, îdareyo demokratîk, herinde merkezîye de rêxistinkerdişo herêmî û komelkî ma vistî dewre. Bi nê hawayî xeta îdeolojîke-polîtîke û hişmendîya çareserîya meseleyan vejîyayî werte.

PKKyî sîyaset û hişmendîya ke verê komployî akerd, sîstemê îqtîdarî û dewlete derbaz kerd. vera înan sîstemêko alternatîf ame afernayene. Bi nê hawayî rayîrê têkoşînê vera komployî abi, metodî aver şîyî. Nê averşîyayîşî partî, cinî, ciwanî, şarê kurdî û pêro komelî rêxistin kerdî. Xopawitiş wina vejîya vernî, komel naye ser o ame perwerdekerdene. Hêzê têkoşînî yê partî û şarî yê vera komployî vurnayîşê na paradîgma bi. Axir na paradîgma sinorê Kurdîstanî derbaz kerdî, vilayê pêro Rojhelatê Mîyanênî û dinya bîye.

Wexto ke ma eşnawit ke Rayber Apo 15ê sibate de teslîmê Tirkîya ame kerdene kurdan nêrazîbîyayîşêko pîl mojna. Amerîka pê nê nêrazîbîyayîşê pîlî şaş mende û wina pawitêne ke Tirkîya Rayber Apoyî darde bikera. La Rayber Apoyî pê ercnayîşê 'Komplo têna vera kurdan nê vera pêro Tirkîya yo' îdam vindarna. Pê xîretê Rayberîye, şarê kurdî û partîye verê ney ame girewtene. Komplokaran vatêne 'Apo qedîya, PKK zî do 6 mengan de biqedo.' La PKK nêqedîya, na îdîaya înan zî pûç bîye. Pê vurnayîşê paradîgma bîyayîo hîrêyîn ê Rayberîye qewimîya. Na paradîgma sîstemê Îmraliyî parçe kerd. Rayber Apoyî bîyayîşo tewr pîl ard ca, nê sînorê Kurdîstanî derbaz kerd bi global. Wexto ke merdimê dinya wayîrê Rayberîye vejîyayî komplokarî kewtî panîk. Çunke têkoşînê seba Rayberîye bîyêne pîl. Înan o çax fam kerd ke komployî senî tesîrê merdiman, Rayber Apoyî û vurîyayîşê paradîgma kerd. Xora Şorişê Rojawanî zî tesîro tewr pîl ê na paradîgma yo.

Rayber Apoyî derheqê awankerdişê sîstemê Îmraliyî de sere de pozîsyonê Amerîka, Îngilîstan û Îsraîlî reyna rol û mîsyonê dezgehanê mîyanneteweyîyan û welatanê Yewîya Ewropa hema verî kifş kerdbi. Polîtîkaya nikayêne ya nê hêzan çita ya?

Rayber Apoyî vatbi ke Îmrali de verî CPTyî o pêşwazî kerdo. CPT dezgehêkê Yewîya Ewropa yo. Xora dima eşkera bi ke Yewîya Ewropa Zîndanê Îmraliyî awan kerdo. Amerîka cara komplo îdare kerdêne. Amerîka îtîraf kerd ke înan waşt PKK tasfîye bikerê la nêeşkayî. Îtalya de hukmatê Massîmo D’Alemayî waşt meseleya kurdan bêra çareserkerdene. La ne hukmatê Îtalya, ne Almanya ne zî Fransa paştî daye ci. Rayber Apoyî wexto ke Îtalya de bi çareserîye pêşkêşê Yewîya Ewropa kerde. La Almanya Rayber Apo nêwaşt. Nê hêzan komplo îdare kerd, Amerîka, Îsraîl û Îngilîstanî rayberîya komployî kerde. Teslîmkerdişê Rayberîye de qet yew tesîrê Tirkîya çinbi. Xora Ecevîtî o çax va 'Amerîka û ê bînan çira Apo teslîmê ma kerd, ma fam nêkerd.' Ajananê CIA Rayberîye remnabî. Seke Rayber Apoyî zî vatbi 'Îmrali de TC gardîyan o, wayîrê zîndanî hêzê bîn ê.'

Ê rojan polîtîkaya nê hêzan çita bîye ewro zî heman a. Înan Îmrali awan kerd û nika zî bo xo îdare kenê. Coka Tirkîya rê nêvanê ke wa komplo wedarna. Nê hêzî wazenê wa komplo dewam bikero. Wa kes mexapîno, Amerîka nêgêrena çareserîya meseleya kurdan yan zî wedarnayîşê tecrîdî. Mîyanê polîtîkayanê Amerîka de cayê PKK û Rayberîye çin o. Amerîka vana 'Apo û PKKyî rê nê.' Amerîka wazena PKK û Rayberîye çin bikera, xeta PDKyî vila bikera. Polîtîkayê Îmraliyî yê Amerîka û Yewîya Ewropa na çarçewe de yê.''

Do dewam bikero…