Endamê Konseya Rayberdişî ya KCKyî Mustafa Karasuyo ke tewrê bernameyê taybetî yê Medya Haber TVyî bi rojdem ercna.

Karasuyî ard ziwan ke serra 2021î serra wayîrvejîyayîşê Rayberê Şarê Kurdî Abdullah Ocalanî û PKKyî bi û vat: ''Dewleta tirke ya ke vera Rayber Apoyî tecrîd xorîyêr kerd heme dinya de ame dîyene ke senî vera kurdan qirkerdişan kena. Rayber Apo û PKK zî hetê şaranê dinya ra îtîbar qezenc kerd. Şarî azadîya fîzîkîye ya Rayber Apoyî wazenê. Coka têkoşîno ke par ame kerdene azadîye nêzdî kerd. Dewleta tirke û îqtîdarê ci yê faşîst se kenê wa bikerê, şarê kurdî û dostê ci do Rayberîye biresnê azadîya ci ya fîzîkîye.''

Karasûyî hîrê cinîyê şorişgêrê ke 9ê çeleyê 2013î de Paris de ameyî qetilkerdene yad kerdî û vist vîrî ke Fransa qanûnanê xo binpaya kena û dewleta tirke ya ke qirkerdiş kerd rê çimanê xo gêna. Karasuyî vat: ''Hemra Sara ronayoxa partîya ma ya. Ma pîya bi serran zîndan de mendî. Xoverdayîşê zîndanî de rolê ci zaf gird o. Xora coka ameye hedefkerdene. Her kes zano ke hîrê cinîyê şorişgêrî meydanê Parisî de hetê dewleta tirke ra ameyî qetilkerdene. Xora eşkera bi ke kiştox elemanê MÎTî yo. kiştox Omer Gunay bi îhtîmalê pîlî ame kiştene. Embaze Sara serkêşa têkoşînê azadîye yê cinîyan bî. Vera dewleta qirkere têkoşîno tarîxî da. Embaze Sara ruhê cinîyan ê Dêrsimî ke serdestîye qebul nêkene temsîl kerdêne. Xeta azadîye ya Rayberîye temsîl kerdêne. Coka ganî heme cinîyî wayîrê Sara vejîyê. Têna cinîyê kurdan nê ganî cinîyê firansizî  semedê cezakerdişê kiştoxan  û mehkumkerdişê Tirkîya têbigêrê. Wayîrvejîyayîşê Sara semedê cinîyan ê kurdan wayîrvejîyayîşê xo, azadîye û demokrasîye yo.''

Karasuyî bale ante xoverdayîşê gerîlayan ser û vat: ''Dewleta tirke ya ke bi mengan o hêrişê Herêmanê Pawitişê yê Medya kena vera xoverdayîşê gerîlayan mecbur mend ke agêro. Dewlet tirke sey Gerê Avaşîn, Zap û Metîna de zî derbeyê pîlî werdî û serûbin biyî. Bîlançoya MPŞyî zî mojneno ke şer senî pîl o.

Karasuyî vist vîrî ke dewleta tirke bi hêrişanê suîqestî sivîlan hedef gena û vat: ''Nê qirkerdişî vera kurdanê azadan yenê kerdene. Na dişmenîya vera kurdan a.  6 ciwanî qey ameyî kiştene? Dewleta tirke her roje hêriş kena. Xora vato 'xetayo ke vakurê Iraqî de kerdo ma do Surîye de mekerê.' Coka hêriş kenê.  Wazenê ke sîstemê demokratîkî vila bikerê. Vera nayî ganî têkoşîn bêro xurtkerdene. Ganî şar wirzo payan ser. Wa têna şerkerdişê YPGyî mepawê. Şar ganî şer bikero. Amerîka û Rûsya seba ke bêvengê nê hêrişî benê. Eke çîyo winayên yewna cayê dinya de bibo, qiyamet qerfîyena. La gama ke Rojawan de beno her kes bêveng o. Eke şarê ma xover bido qeti do vera dewleta tirke ser bikewo. Ganî şarê Rojawanî bi waştişê qedînayîşê îşxalî debikewo serra newî. Eke şarê ma rêxistinkerde têbigêro dewleta tirke nêeşkena cayanê îşxlakerdeyan de bimana.''

Karayusî ke derheqê Kongreya Ciwanan a HDPyî ya ke çend rojî verî Amed de ameye kerdene qisey kerd vat: ''Ciwanan kongre de hersê xo da teber, eslê xo nêrazîbîyayîşê yew  komelî merdim eşkeno vindertişê ciwanan ra bivîno. O vindertişê şarî yo. Na çarçewe de kongre de herso pîl û azmê têkoşînî bibi. Rixmê heme hêrişanê îqtîdarê AKP-MHPyî şarê ma sereberz payra yo. Vindertişê Amedî vindertişê kurdan o. Vindertişê ciwananê Amedî vindertişê heme ciwanan ê Kurdîstanî yo.''

Mustafa Karasuyî vat: ''Wazenê îradeyê kurdan bişiknê coka her hetî ra hêriş kenê. Hêrişê vera Denîze Poyraz tesaduf nîyo. Nê hêrişê plankerde yê. Metropolan de bi mîlyonan kurdî estê. Bi hêrişanê plankerdeyan wazenê îradeyê kurdan bişiknê.  Konya de keyeyêkî ra 7 kesî ameyî kiştene, keyeyê Şenyaşarî ra 3 kesî ameyî kiştene, cînayetê Denîze Poyraz, serebûtê Bahçelîevlerî nê pêroyî netîceyê zîhnîyetê hêrişkarî de ameyî qewimîyayêne. Ganî şarê kurdî rêxistinkerde her ca de xopawitişê xo biaferno. Ganî Amed, Riha, Êlih, Mêrdîn, Riha her ca de şarê ma wirzo payan ser. Senî ke wextê Hrant Dînkî de şar vejîya kuçeyan ganî wina şar vejîyo meydanan. Ganî vera polîtîkayanê hêrişkaran û hêrişanê qirkerdişî şarê Tirkîya û hêzê demokrasîyî îtîfaqê demokrasîyî ronê. Dormeyê HDPyî ye hêzêkê demokrasî esto, ganî no dahîna hîra bo. Ganî hêzê demokrasîyî miheqeq bêrê têhet.''