Endamê Konseya Rayberdişî ya KCKyî Mustafa Karasuyî cewab da persanê ANFyî û weçînayîşan ra dima rewşa HDPyî, îtîfaqê HDPyî, nîqaşê serê HDPyî û prosesê rexnekerdiş-rexnedayîşî ercnayî.

Qismê diyînî yê roportajê Karasuyî ra tay noqtayê girîngî wina yê:

''Dewleta tirke seba ke qirkerdişê kurdan temam bikera kena ke Kurdîstanî hem Tirkîya hem zî dinya ra biqerifna. Dewleta tirke seba ke qirkerdişê kurdan bîyara ca nêverdana ke hêzê demokratîkî-sosyalîstî kurdan de bêrê têhet. Coka mutefîqê HDPyî yê sosyalîst û demokratîkî raştê hêrişan yenê. Îtîfaqê Kede û Azadîye vera na polîtîkaya qerifnayîşî ya dewlete platformêkê demokrasî awan kerd. Êyê ke vera nê îtîfaqî yê û wazenê ke îtîfaq vila bibo bi vateyê dewleta tirke têgêrenê. Eke şarê kurdî û hêzê azadîye wazenê ke kurdî azad bibê û Tirkîya demokratîk binê yan zî statuyêkî bivisnê destî ganî girîngîye bidê polîtîkayanê îtîfaqê demokrasî-sosyalîzmî. 

Partîya Çep a Keske-HDPyî weçînayîşan de kerd ke bi têdûştî wekîlê cinîyî bikewê Meclîsî. Nê hetî ra ma eşkenê vajê ke cinîyan weçînayîşan de bi têkoşînê xo têdûştîya cînsîye ser viste. Êyê ke sîyasetê HDPyî rexne kenê ganî na raştîye zî bivînê. 

HDPyî nika bira kongre girewta. Na bire seba raştkerdişê xeletî û kêmasîyan, prosesê rexneyan zaf girîng a. HDP vano ke ê do bivurîyê. Xora no vurîyayîş do fikrîyat û felsefeya ci de ney îdareyê kadroyan de do bibo. Ganî kongre ra dima HDK û KCD hîna zaf erkan bigêro xo ser, rêxistinîya xo hîra bikero. HDP zî kongre ra dima ganî xo biresno pêro beşanê komelî, bi xurtî xo rêxistin bikero û felsefeya ronîyayîşê xo bi zixmî bîyaro ca. Ganî HDP xo rê esas bikero ke bibo partîya cinîyan, ciwanan, demokrasî û kedkaran. Ganî HDP şarî reyde biranê xo bigêro, weçînayîşan ra ver derheqê namzedanê xo de fikrê şarî bigêro.

Hemserekanê Pêroyîyan ê HDPyî vat ke ê do kongre de newe ra namzedê hemserekîye nêbê. No tewir raşt o. Nê hemserekan heta nika seba servistişê HDPyî xîret kerd. La dînamîzm şert o. Nika ra pey zî kamî bibê hemserekî wa bibê HDP do hîna xurt bibo. 

Dewleta tirke polîtîkaya qirkere ancax pê demokratîkbîyayîşî verdena. Şarê kurdî zî pê têkoşînê zixmî eşkeno xxo biresno cuya azade û demokratîke. Kurdî çend ke polîtîkayanê şerê taybetî û kayanê şerî bêtesîr bikerê hende serkewte benê. Ewro çarçewa polîtîkayanê şerê taybetî de dewlete reyna HUDA-PAR visto dewre. Dewleta tirke do HUDA-PARî vera kurdan û têgêrayîşê azadîye bişuxilno. 

Weçînayîşan ra dima hetê merkezî ra vera HDPyî polîtîkayê şerê taybetî yenê kerdene. Bi taybetî medyaya dîjîtale ser ra HDP dîyeno bombayan ver. Heyf ke HDP nêeşka nê polîtîkayan pûç bikero. A raşte hêrişê winayênî mojnenê ke HDP hetê perwerdeyê îdeolojîkî ra kêm mendo. Mîyanê HDPyî ra zî tay rexneyî vejîyayî werte. Xora no normal o, ganî yew partîya demokratîke bieşka bi her hawayî rexneyê xo bikera. La ganî îdarekar, kadro û endamê HDPyî hêverî rexneyanê xo mîyanê xo de pêşkêş bikerê.''