Serekê verênî yê îstîxbaratê tirkî Îsmaîl Hakki Pekînî îtîraf kerbi ke înan Qirkerdişê Parisî kerd û vatbi ke ganî îdarekarê bînî yê PKKyî yê Ewropa zî bêrê qirkerdene.

Endamê Komîteya Rayberdişî ya PKKyî Murat Karayilanî ke Stêrk TVyî de rojdem ercna derheqê nê îtîrafan de wina vat:

Qendîl de nêeşkenê ma vanê ma Ewropa de bikişê

''Hîşmendîya înan faşîst û qirker a. Nê wazenê kurdan qir bikera. Dewaya PKKyî dewaya kurdan a. Roja dişemeyî Roja Ziwanê Dayîke ya Dinya bi. Merdimî pê kamyew ziwanî ameyî dinya ganî pê ci qisey bikerê. Dewaya ma na ya. Ê nêeşkenê pê kiştişî ma biqedînê. Ê Kurdîstan de polîtîkaya qirkerdişî anê ca. Zîndanî pê kurdan pirr ê. Ma do heta peynî xo ver bidê. Eke ma şehîd bibê zî cayê ma cade beno pirr. Axir înan na raştîye fam nêkerde. Serra 1984î ra nata ê vanê ê do PKK bikişê. Qendîl de nêşkenê vanê ma Paris, Bruksel, Berlin de bikişê. Konseya Ewropa, Neteweyê Yewbîyayeyî, dezgehê heqanê merdiman, Mehkemeya Heqanê Merdiman a Ewropa (MHME) çade yê? Ê bêvengîya Ewropa û hegemonyaya Amerîka ra hende kaw bîyê. Fransa dewaya Qirkerdişê Parisî nêkerde. Ez venga Macronî dana ke rîyê Erdoganî eşkera bikero.  Pekîn senî eşkeno hende rehet qisey bikero? Ê Fransa ra Ewropa ra paştî gênê. Îsbat bibi ke MÎTî Qirkerdişê Parisî kerdo.  La Fransa no qirkerdiş mîyan kerd. Ma wazenê wa edalet bêro caardene. ''

Soylu wa bi xo bêro ez ha tîya de ya

Wezîrê Karanê Zereyî yê Tirkîya Suleyman Soyluyî xoverdayîşê Garê ra dima vatbi ke 'Ê do Murat Karayilan parçe bikerê.' Karayilanî wina cewabê Soyluyî da:

''Seba ke ê Garê de bin kewtî daymîş nêbenê. Senî karmendêko payeberz wina qisey keno? Hîşmendîya înan hîşmendîya qirker a. Meseleya kurdan de zî tewirê înan wina yo. Eke ma şehadetî ra bitersayêne xora ma tîya de şer nêkerdêne. Ma fedayîyê nê şarî yê û hertim amade yê. Wa o bi xo bêro ez ha tîya de ya. Tirkîya de zûrkero tewr pîl soylu yo. 2016 ra nata vano 'emser do bibo peynîya PKKyî.' No şero psîkolojîk o. Senî ê tirk ê ma zî kurd ê. Heqê ma esto ke ma xo îdare bikerê. Heqê ma yê ziwan û estbîyayîşî esto. Ma amade yê ke nê rayîrî de bedelan bidê. Çunke rayîrê ma rayîro raşt o. Ma seba azadîye û estbîyayîşî nê têkoşînî anê ca. Ma gefanê çewî ra nêtersenê.''

Netîceya kombîyayîşê ma tesîrê xoverdayîşê Garê kerd

Endamê Komîteya Rayberdişî ya PKKyî Murat Karayilanî peynî de kombîyayîşê Konseya Fermandarîye ya HPGyî ercna. Karayilanî vat:

''Her beşî ra 40 embazê ma tewrê kombîyayîşî bîyî. Ma pêro meseleyê xo nîqaş kerdî. Rojdemê kombîyayîşî 'Ma senî ser kewenê' bi. Ma birê girîngî girewtî, plansazîya serrane kerde, perspektîfê xo kerd zelal. Ma 3 serran ra nata waştêne hêzêkê neweyî yê gerîlayan ronê. Ma wazenê gerîlatîya dewrê neweyî awan bikerê ke vera pêro teknîk û metodî şer bikera. Kombîyayîşî de ma kêmasîyê nê armancî nîqaş kerdî.

Mîyanê ma de zî tewirê vera vurîyayîşî estbî. Xora kes nêeşkeno hende lez çîyê neweyî qebul bikero. Wa şarê ma bizano pêro fermandaranê ma xo rexne kerd, rexneyê xo dayî. Ez pê bawer a ke netîceya nê kombîyayîşî tesîrê xoverdayîşê Garê kerd. Çunke embazî kombîyayîşî ra derbazê Garê bîyî. Serkewtişê Garê mojna ke birê nê kombîyayîşî çend girîng ê. Ma wazenê gerîlatîya hîna bimarîfet, qerardar û çêre awan bikerê. Ganî gerîlayêke herinda 50 gerîlayan de biba/o. Garê de hende teyarayî estbî la reyna zî tîmê ma eşkayêne têbigêrê. Xoverdayîşê Garê de 15 embazê ma şehîd bîyî. Nê pêro zî şehîdê ercîyaye yê.

Kombîyayîşê ma bi hawayêkê serkewteyî qedîya. Ez pê bawer a ke kombîyayîşê ma pawitişanê şehîd, dadî û şarê ma rê bibo cewab. Ma do dima plansazî û biranê nê kombîyayîşî ser o rayraşîyayîşêk bikerê. Rayraşîyayîşê azadîya Rayber Apo û Kurdîstanî. Ma do çarçewa Hemleya 'Wext Wextê Azadîye yo' de zêdêr ser bikewê. Ganî ma tay kêmasîyanê xo safî bikerê. Ma pê bawer ê ke gerîlayê azadîye do bibê gerîlayê serkewtişî û gerîlayê azadîya Rayber Apo û Kurdîstanî.''