Endamê Komîteya Rayberdişî ya PKKyî Murat Karayilanî û Fermandarê Qerargehê Merkezî yê Pawitişê Şarî Murat Karayilanî cewab da persanê Yenî Ozgur Politika.

Qiseykerdişê Karayilanî ra beşêk wina yo:

''2011 'Wisarê Ereban' ra dima a raşte pê mudaxeleyê hêzanê teberî û Tirkîya Rojhelatê Mîyanênî de 'zimistanê ereban' dest pêkerd. Nê prosesî de rêxistinê sey El Nusra, OSO, Îhvan-Muslîmînî ûsn vejîyayî werte. DAÎŞ zî nînan ra yew bi. La DAÎŞ pê fînansman û paştdayîşê tay hêzan hende bi pîl. Bi taybetî 2014 ra dima DAÎŞî Sûrîye de serdestîye viste destî. Girîngîya ci ya jeo-stratejîke ra sebeb pêro hêzanê serdestan tim waşt ke Rojhelatê Mîyanênî bivisnê destî. Ewro zî wina yo. DAÎŞî 11ê hezîrana 2014î de rojêke de Musul vist destî, qirkerdişî kerdî. Têna Rojhelatê Mîyanênî de nê pêro dinya de cergê DAÎŞî hînî bi rehetî meydanê teyarayan ra şîyêne Reqa. Yanî rayîrê dinya înan rê ameybî akerdene. Welatanê Ewropa têgêrayîşê DAÎŞî peygoş kerdî.

Xora mabênê AKP û DAÎŞî de hetê îdeolojî ra têkilîyêke esta.Ewro xeylêk done û belgeyî têkilîyanê înan eşkera kenê. DAÎŞî pê mudaxeleyê dewleta tirke verê xo da Kurdîstanî, kurdan. Heta dewleta tirke kerd ke DAÎŞ verê xo bido Kobanê. DAÎŞî têna Kobanê nê Şingal, Mexmûr, Hewlêr û Kerkûk kerdî hedef.

Verî Rayberîye ma hişyar kerdî û ma pê plananê DAÎŞî yê vera Başûrî hesîyayî. No seba ma yew ferman bi. Ma PDK û YNKyî ra waşt ke wa ma rê rayîrêk abikerê, ma vera DAÎŞî şer bikerê la înan qebul nêkerd. PDKyî vat ke Şingal de bi hezaran pêşmergeyî estê û ê eşkenê êzidîyan bipawê. La ma xora pabeyê destûrê înan nêbîyî. Ma bi fermandarîya Dilşêr Herekolî de 12 embazê xo şawtî Şingalî. Reyan bi fermandarîya embaz Têkoşerî de ma 8 embazê xo şawitî Mexmûrî. Ma tay embazî zî şawitî Kerkûkî. Embazanê ma tîya de amadekarîyê xo kerdî.

Koma Şingalî 9-10 kesî perwerde kerdî. Şingal de PDKyî 3 embazê ma tepiştî. La ê bînan Şingal de xebatêka pîle kerde. Şehîd Saît Hesenî tîya de kedêka pîle daye. Wexto ke DAÎŞî hêrişê Şingalî kerd, pêşmergeyî remayî. Musilî ra ver bi Mexmûrî 22 warê ciwîyayîşî estê û tîya de hêzê Iraqî estbîyî. La DAÎŞ bê guleyêkî nê cayî vistî destî û resa Mexmûr.

3ê tebaxe de saete 9 de embaz Dilşêr Herekolî ma rê vat ke DAÎŞî hêriş kerdo. Embaz Herekolî vat ke eke hêzê ma biresê Şingalî o do bieşko înan rê rayberîye bikero. Ma Hemserekîya KCKyî de qisey kerd û seba mudaxeleyê Şingalî taburê xo amade kerd. Embazî bi lezî şîyî Şingal û xo resna embazanê bînan. Ma plan kerd ke Koyê Şingalî bigêrê binê pawitişî. Xora DAÎŞî hêrişê koyî zî kerd la embazanê ma nêverda. Hêzanê ma de tecrubeyê şerê erazî û manewra estbîyî, DAÎŞ de çinbîyî. DAÎŞî 3 mengan hêriş kerd la netîce nêgirewte. Ma koy de hukmê xo naro.

Hêzanê ma pêro şarê Şingalî rê vat ke wa vejîyo Koyê Şingalî. La narey bi des hezaran kesî koyan de bîyê pêser û meseleya awe û werdî virazîyaye. Ma seba ney veng da, têna tay helîkopteran hewayî ra awe eşte. Uca de trajedîyêka pîle estbîye. Vêşanîye û têşanîye ra merdimî merdêne. Ma muracatê Fermandarîya YPGyî kerd. Ma waşt ke wa mabênê Şingal û Rojawanî de Cezaa de korîdorêk wa bêro akerdene. Embazan vat ke uca de yew kelaya ke destê DAÎŞî de bîye, wa bêra girewtene û dima korîdor bêro akerdene. Hêzê YPGyî a kela de ca bîyî û korîdor ame akerdene. Bi nê hawayî ma kerd ke merdimî pê wesayîtan Şibgalî ra vejîyê. 8-18ê tebaxe de 120 hezar şingalijî ameyî berdene bi Rojawanî. Şarê Rojawanî wesayîtê xo şawitêne, çunke Şingal de wesayît çinbi. Xêrê YPG, hêzanê HPGyî û fermandarê Egîd Civyanî ra transferêko pîl ame kerdene.

O çax ma embaz Egîd û Dilşêrî rê pêşnîyaz kerd ke wa her kes Koyê Şingalî ra nêşoro û tay êzidîyî wa hetê hêzan de koy de bimanê. Bi nê hawayî Kampa Serdeştî de 10 hezar kesî mendî, ê bînî şîyî Rojawan. O çax pêkewtişî reyna qewimîyayî. HPGyî pê leweyê stratejîkî yê Şingalî tepiştbî. O çax DAÎŞî pê hêzêkê pîlî hêrişê hêzanê korîdorî kerd. Embazî neçare mendî ke korîdorî ra xo apey bigêrê û korîdor qefilîya. YPGyî hêrişanê vera Cezaa de xoverdayîşêko pîl kerd. YPGyî Cezaa de 80 şehîdî dayî la axir DAÎŞ nêeşka Cezaa bivisno destî. La seba ke korîdor qefilîya Koyê Şingalî gêrîya binê ablûqa. Xora erdî ra mudaxele mumkîn nêbîyêne. 3 mengan embazê ma û şarê Şingalî uca de binê ablûqa de mendî. DAÎŞî hêrişanê xo rê dewam kerd la pêro hêrişê ci ameyî şiknayene û DAÎŞî netîceyêke nêviste destî."