Fermandarê Qerargehê Merkezê Pawitişê Şarî (MPŞ) Murat Karayilanî bi wesîleya 15ê Tebaxe veng kerd gerîlayan. Gerîla TVyî  vîdeoyê nê vengdayîşî pare kerd. Qiseykerdişê Karayilanî tay nuqteyê muhîmî wina yê:

''Ma vernî de şima hemîyan selam kenê û Roşanê Ganîbîyayîşî yê heme embazan bimbarek kenê û serkewtiş wazenê. Şexsê fermandarê ma yê bêmergî hemra Egîdî de heme şehîdanê ma bi hurmet yad kenê û sozê serkwtişî newe kenê. Ma do waştişê şehîdan ê azadkerdişê Kurdîstan û Rayber Apoyî bîyarê ca.

Hemleya 15ê Tebaxe şertanê zaf zehmetan de ameye rêxistinkerdene. Komelê kurdan bartengê çînbîyayîşî de bi. Bado ke serewedaritişê kurdan û Kurdîstanî ameyî eciqnayene polîtîkaya asîmîlasyonî û sîyasetê qirkerdişî ame rayraberdene. Bi Planê Şark Islahatî waşt kurdan çîn bikerê. Waşt kurdan qirkerdişê fîzîkî û kulturkî ra ravêrnê. Vera nê sîyasetî vejîyayîşê Rayber Apoyî qewimîya. No vejîyayîşêko ke tarîxî bi. Rayber Apoyî verî fîkr aferna. Fikrê neteweyî û şorişêgrî  aver berd. Seke yeno zanayene  bingeyê nê fikrî de grûbêke ameye ronayene, partîbîyayîş aver şi û PKK ame ronayene. La dişmenî cade mudaxale kerd. Cuntaya faşîste ya 12ê Êlule destna hukmatê Tirkîya ser. Vera çepgîranê tirkan û Têgêrayîşê Azadîye yê Kurdîstanî hêrişêko xurt dîya destpêkerdene. Planê Şark Islahatî kewt dewre. Ziwanî ra heta kulturê ci her çîyê kurdan bi qedexe. Vera nê Amed de serkêşîya Mazîûm Doganî de xoverdayîş dîya destpêkerdene. Xoverdayoxanê Zîndanê Amedî vat 'Ma do teslîm mebê.' Rayberîye naye ra paştî girewte. O wexte agêrayîşê welatî û vera dewleta tirke çeke şuxulnayîş çîyo wina rehet nêbi. Hemleya 15ê Tebaxe serkêşîya hemra Egîdî de wina ameye kerdene.

Na hemleyêka çekdare bî la eslê xo de vejîyayîşêko zaf muhîm bi. Îdeolojîk bi, komelkî bi, neteweyî bi, vera koleteyî serwedaritiş bi. Her çîya ver vera koletîya bi xo rê, koletîya komelkîye serwedarişêk bi. Serederatişê vera sîstemê koletîye û qirkerdişî bi. Coka manadar bî. Na hemla hemleya wayîrvejîyayîşê merdimîye bî. Kurdîstan de şexsê komelê kurdan de merdimîye gerîyaybî binê lingan, eciqyayêne. Vera nê merdimanê biwîjdan sere de Rayber Apo û êyê ke dormeyê ci de ameyî têhet vejîyayîşêko wîjdanî û merdimî kerd. Semedê pawitişê neteweyî xopawitişêko meşrû aver berd, xopawitişêk bi. Bi kilmî ma eşkenê wina vajê. Eke mebîyêne, nêbînê. Eke mebîyêne komel nêbînê.

Dewlete vatêne 72 saete emrê ci est o û xeylêk kesan û rêxistinanê bînan zî vatêne çew nêeşkenê vera dewleta tirke de vindero. Grûba ke Hemleya 15ê Tebaxe kerde hûmara ci zaf nêbî û çekê înan kêm bi. Sey serhildananê verênan de bi des hezaran leşkerî çînê bî. Grûbe qije bî la zerrîya ci pîle bî. Bawerî û waştişê pîl bi. Hetê bînî ra tasfîyekarîye sere karî de bî.  Rixmê heme zehmetîyan Hemleya 15ê Tebaxe mîyanê 9 serran de ser kewte. Serê meseleya kurdan akerd. Kurdan vat ma est ê. Kurdanê ke tersî ra nêeftayêne qisey bikerî vejîyayî kuçeyan. Verî Cizîre û Nisêbîn dima ra heme Kurdîstan de serhildanan dest pêkerd.  Kurdê merdeyî bîyî ganî. Coka şoriş bi şorişê ganîbîyayîşî.  Pê keda hemrayan Egîd, Erdal, Bedranû Havva û bi seyan hermayanê bînan no şoriş bi xoverdayîşêko muhîm.

29 serranê peyênan de meseleya kurdî semedê çareserkerdişî masa de ya. O wextî ra nata Rayberîye ma semedê  çareserîya sîyasîyî zaf kede daye. Xeylêk adirbirnayîşî îlan kerdî. Reyna Rayberîya ma semedê çareserîya sîyasîye verê xo da Ewropa. La ma dî se bi? Ewropa heme qanûnê xo binpay kerdî û heqê ci yê sîyasîyî qebul nêkerd. Bi hewayêkê bêhuqûq û bêqanûnî Rayberîya remna û teslîmê Tirkîya kerd. Komployê mîyanneteweyîyî wina ame kerdene. No komplo eslê xo de hemleya temamkerdişê qirkerdişî bi. Înan vatêne qey eke ê Rayber Apoyî tepişê PKK tesfîye bena. La Rayber Apoyî Zîndanê Îmraliyî de bi tewirê xo yê xoverdayoxî komplo betal kerd. Hukmatê AKPyî yo ke 2002 ame îqtîdar qirkerdişê vera kurdan de israr kerd. Vera ney sey hemleya dîyêne ya 15ê Tebaxe Hemleya 1ê Hezîrane ameye kerdene. Komplo bi temamî meqedîyo zî ame betalkerdene.  

Ma eşkenê vaje ke peynîya 2012yî de artêşa tirke hinda nêeşkayêne şer bikero. Çunke zaf cayî binê kontrolê gerîlayan de bî. O wext dişmenî 2013 de adirbirnayîş qebul kerd. Di rey protokolî ameyî kerdene la niyetê înan semedê çareserî çînêbi. Artêşa tirke pê hetkarîya NATOyî adirbirnayîş xeripna. Şarê ma dî ke ê kalekolan û mewzîyan virazenê û vera nê çalakîyî kerdî. Amed de şehadetî zî qewimîyayî. Wextê adirbirnayîşî de Planê Çokdayîşî amade kerd. La ma xo sist nêkerd, tecrubeyê ma bibî, hîşyarkerdişê Rayber Apoyî bibî. Vera nê planî ma dest pê xoverdayîşê bajaran, xoverdayîşî xoserîya demokratîke kerd. Dewleta tirke sey nê sey serewedaritiş û hendek kena. Wina nêbi. O serwedaritişêk nêbi. Ma semedê xoserîye şîyî dewlete ser. Cehdkerdişêko mutewazî bi la dewleta tirke û hukmatê AKP zaf giran hêriş kerd. Serkêşîya hemrayan Çîyager, Xebatkar, Zeryan de têkoşînê biheybetî ameyî kerdene.  Memet Tunçî vat  'ma milê çewt nêkenê, wa sereyê şima pê ma berz o.' Serhildanan o wextî mîrasêk aferna. Wina qeyde planê înan pûç vejîyayî.

Dewleta tirke 2016 de konseptêko newe fîna dewre. Tay hetan waşt darbe bikerê û la eslê ci  AKP-MHPyî darba kerde. Dima ra semedê dahîna hîrakerdişê Tirkîya bi konseptêkê newîyî qerar girewt ke teberê sînorî de vera PKKyî şer bikerê. Bêşik no konsept semedê kurdan tehlukeyin bi. Ma pê têkoşînî cewabê ci da. Serra 2016î terîxê têkoşînê ma de bîye serra fedayîtîye. Na serre de 27 çalakîyê fedayîyî yê serkewteyî ameyî kerden. Reyna zaf vejîyayîşê fedaîtîyî zî qewimîyayî. Dişmenî pîya bi çeteya û xayînanê kurdan her ca de vera kurdan hêrişî zêdînayî.  

Rayber Apoyî waşt wa kurdî bi stratejîya hempare Kurdîstan de vejîye sehneyê tarîxî. Bi waştişê ey Hewlêr de çend rey kongreyê yewîya neteweyîye ameyî kerdene.  La dima ra mudaxaleyî ameyî kerdene, tay hêzanê PDK hîşyar kerd û proses ame girankerdene û vindarnayene. Eslê xo de çew nêva qey vindarîyayî. Têgêrayîşê wextê hêrişê DAÎŞî de paştî daye Şingal û Kobanê. Ma 2015î ra heta 2016î hetan dir bitaybetî bi PDKyî muneqeşeyî kerd. La PDKyî ver yewîya kurdan kiştê dişmenî de ca girewt. Eke PDKyî wina mekerdêne nika rewşa kurdan wina nêbîyênî. Qismêkê kurdan nika paştî dano dewleta tirke la ganî kurdê bînî nê qebul mekerê. Yewbîyayîşê kurdan wezîfeyêko bimbarek o. Semedê pawitişê estbîyayîşê kurdan û  na herre de azad ciwîyayîşî ganî ma zafêr cehd bikerê. Dewleta tirke wazenê verî ma tesfîye bikero û dima PDK zî tede hemeyan tesfîye bikero. Ma nê serhildananê verênan ra zanê. Terteleyê Dêrsimî, Serewedatirişê Şêx Seîd û Agirî tim wina bi. Dewleta tirke nika vana a vera PKKyî şer kena la heme destkewteyê kurdan hedef de yê. Reyna heme şarê herême zî hedef de yê. Tecrîdê Îmralîyî nika heme welatî ra vila kerdo.

Dewleta tirke bi pereyî artêşa newî afernaya ke vera hêzanê ma nêeşkena şer bikero. La pê îstîhbarat û teknîkî wazenê ser bikewê. Eke destê ci de teyara çînêbo eşkena bikewo Herêmanê Pawitişî yê Medya? Çirey nêeşkena! Ê bi hêzê xo nê pê têknîk û îstîbaratî şer kenê. Inkey kutik û ajanî zî fînayî dewre. Şerêko psîkolojîk o. Gerîlayî ewro Vakurê Kurdîstanî û Herêmanê Pawitişî yê Medya de yew nêwîtîye ciwîyenê. Ma naye ra vanê gerîlayê demî.  Xo hetê hunerê şerî ra besto tê, branşt bîyo pîspor, resayo taktîkê zengnîye, mîyan têgêreno, hetê îdeolojî ra xo aver berdo û vera heme şerê psîkolojîkî eşkeno şer bikero û her hetî ra eşkeno serkêşîye bikero.

2020 de Heftanîn de şerê tîmî ame kerdene. 2021 de Garê de dewam kerd, dima Avaşîn, Zap û Metîna de ame averberdene û planê dewleta tirke pûç kerdî. Xoverdayîşê 2021î dişmen bin fîna. Hemrayê ma fedakarîya pîle kenê. Têna şehîdê ma  nê, embazê ma yê ke 4 menganî ra nata têkoşîn kenê, tarîx nusenê. Ma nêwazenê xo biwasifnê la çîyê ke qewimîyenê tarîx de zaf tay bîyî. Her çîyî ra ver hunerê şerî de pelêko newe yeno nuştene. Artêşa tirke bi paştayîşê NATOyî û şuxulnayîşê çekanê kîmyewîyan hêriş kena. Kurdê xayînî îstîhbarat danê ci. Rixmê naye gerîlayî senî wina yew artêşa girde vindarnenê? Ma nê wazenê inkey ra serkewtişê xo îlan bikerê, şer hema dewam keno. La dişmen heta inkey ser nêkewto. No binkewtişê dewleta tirke yo. Hendê hêzê ci est o, her hewte hêzê xo bedilnena, tim mirênî. Dewleta tirke tarîxê xo de çirey wina vînîkerdişî nêdayî. Şerî çirey wina 4 mengî derg nêkerd. Na rewşêka newî ya.

Ewro gerîlayî bi fikrê Rayber Apoyî ruhê 15ê Tebaxe şer kenê. Nê têkoşînî de de çîyo tewr erjîyaye û muhîm oyo ke cinîyê kurdan xeta Sara ( Sakîne Cansiz) de , rêçê Zîlne û Delale Amedan de, şexsê Mizgîne, Şevîne, Nalîne, Berfîne, Armance, Avînare û xeylêk hemrayanê xo yê bînan de îradebîyayîşê cinîya kurde berz kenê. Şero ke ewro endamê YJA Starî kenê semedê heme cinîyan ê dinya vejîyayîşêko newe yo. Nê semedî ra şerê ko heta nika bîyo pîya bi xo xeylêk ercê neweyî vetê meydan.  Ma zî vanê ke nê ercê ke ameyî afernayene bingeyê serkewtişê pîlî zerrîya xo de kirişenî. Yanî eke ma na çarçewe de têbigêrê  serkewtişê ma qetî yo. Xora ma cade nêvanê ma ser kewtî. Hema destê ma binê kerra de yo. Barê ma giran o. Tîya qalkerdiş û herême de şerkerdiş seycîye nîyo. Coka ma tem nêeşkenê xoverdayîşê hemrayanêxo bîyarê ziwan.

7 serrî yo şer bêmabên dewam keno. Ê wazenê demê kilmî de PKKyî tesfîye bikerê la  raştîya PKKyî, raştîya Gerîlayanê Azadîye yê Kurdîstanî , heqîqetê şarê kurdî yew îrade yo û binate de yo. Dişmen inkey wazeno serrgêra Lozanî de qirkerdişî temam bikero. Coka 2022 û 2023 muhîm ê. Prosesê verê ma muhîm o. No dem demê bedilnayîşî yo. Ewro gerîlayî asta tewr berze tê xover danê. No şer semedê estbîyayîş û ameyoxê Rayberîye û şarê ma û şaranê herême muhîm o. No şerêko bimbarek o. 24 temmuze 7 serrê nê şerî bîyî de. Dişmen hema zî ser nêekwto. Raşta ya ma bedelê giranî dayî, dişmen tay cayî îşxal kerdî la dişmen nêresayo waştişê xo, ser nêkewto. Sîstemê dişmenî hinî sist bîyo ke tay mendo birijîyo.  Xeyrê têkoşînê şehîdan ma heta ewro ameyî. Ma do rayraşîyayîşê înan o bimbarekî biresnê serkewtişî. Ma deyndarê şehîdan ê, ma do deynê xo bidê. Ma sey hermrayanê qehremana ganî berpirsîyarîya xo bîyarê ca. Eke ma kêmayîyaynê xo ra derse vejê û tecrubeyanê raşt bişuxulnê ma eşkenê vera dişmenî ser bikewê.''